Performanca akrobatike apo ekuilibri, numra xhonglërimi, kërcime plot gjallëri, me Cirkun Kombëtar që tenton të “Shkund shpirtin” e çdo spektatori përmes artit, Tirana duket më e lehtë.
Në shtëpinë e improvizuar pranë Komunës së Parisit, trupa e artistëve, me të rinj e profesionistë, këtë fundjavë krijuan një atmosferë spektakolare duke mbajtur gjallë ëndrrën e tyre, për vijimësinë e Cirkut, por edhe të publikut që duartroket këto ekzibicione.
Artistët e Cirkut sjellin mesazhe për të zgjedhur paqen, njeriun, ndaj ambicies që ndez konflikte, sepse vetëm kështu mund të arrihet në fitoren më të madhe, atë të dritës së shpresës në sytë e vogëlushëve.
Me numrat humoristikë e shkathtësinë e Gerald Shimës, prestigjiatorin Julian Kazasi e xhongleren Eris Hoxha, dhe padyshim performancat e Rubit të Cirkut dhe të shumë artistëve të tjerë, trupa e Cirkut me premierën e re, bën të mundur në skenë atë çka duket e pabesueshme.
Me duartrokitjet e publikut, dhe këtë atmosferë të ngrohtë, Cirku, ndonëse i neglizhuar për vite e ka zgjidhur tanimë dilemën hamletiane “të jesh a të mos jesh”. Duke mbajtur gjallë mbi 6 dekada traditë, presin dashamirësit për t’u dhuruar një shfaqje të larmishme edhe fundjavën që vjen.
