Dartford, një qytet afër Londrës ka votuar në përputhje me fituesin e çdo sondazhi që nga viti 1964. Nisur nga ky fakt , shkruan agjencia e lajmeve Reuters kryeministri britanik Rishi Sunak duhet të shqetësohet pasi banorët e këtij qyteti po bëhen disa nga parashikuesit më të mirë të zgjedhjeve të përgjithshme.
Sondazhet dhe intervistat me disa dhjetëra votues në këtë zonë tregojnë se konservatorët ka të ngjarë të humbasin kontrollin e vendit.
Në rrugët e këtij qyteti, ku pensionistët dalin nga supermarket dhe nënat i shtynin të vegjlit e tyre me karroca nëpër rrugët kryesore, e vetmja gjë për të cilën pothuajse çdo votues bie dakord është se Britania e Madhe nuk është në ditët e veta më të mira.
Sondazhet e opinionit tregojnë se partia e kryeministrit Sunak është pas Partisë Laburiste të opozitës me rreth 20 përqindjeje.
Pakënaqësia e banorëve në qytetin Dartford është një ogur i zi për një parti politike që synon të fitojë zgjedhjet e ardhshme diçka që Sunak duhet ta kishte mësuar kur e vizitoi dy herë qytetin verën e kaluar.
Banorët e qytetit përpiqen të shpjegojnë pse zona ka pasqyruar rezultatet në nivel kombëtar në mënyrë më të mirë të mundshme se kudo tjetër në Britaninë e Madhe.
Ata tregojnë se çfarë i shqetëson më tepër aktualisht. Joanne Godwin, një asistente personale dhe me bindje konservatore thotë se i është dashur të shkurtojë shpenzimet e Krishtlindjeve për ushqim dhe dhurata, sepse ato janë bërë shumë të shtrenjta.
“Padyshim që kriza e kostos së jetesës, ne jemi një familje me katër anëtarë, dy fëmijë të që janë në shkollë, dhe dy të tjerë punojnë në punë të mira me kohë të plotë dhe prapë e kemi vërtet të vështirë të blejmë, gjërat janë rritur kaq shumë.”
Familjet britanike kanë pësuar rënien më të madhe të standardeve të jetesës në historinë moderne që nga zgjedhjet e fundit në 2019 pas pandemisë së koronavirusit, agresionit rus në Ukrainë dhe daljes së Britanisë së Madhe nga Bashkimi Evropian.
“Kostot e jetesës po rriten, veçanërisht faturat. Dhe sikur të mos mjaftonte kjo, ti duhet të paguash edhe më shumë për parkimin dhe nëse bëni vetëm një gabim të vogël, atëherë duhet të paguani gjobë. Mendoj se qeveria është duke marrë kudo para. Kështu besoj unë”, tha Ali Syed.
Michael Ostertag, 38 vjeç, i cili punon si fotograf dhe stilist dhe planifikon të votojë për Laburistët, thotë se mungesa e banesave të përballueshme është një nga gjërat që e shqetëson më shumë aktualisht.
“Edhe pse ka më shumë banesa, ato janë për të gjithë ata qytetarë që vijnë nga lagjet e Londrës dhe që duan të largohen nga kryeqyteti. Por nuk ka vërtet shumë mbështetje për njerëzit që jetojnë në banesa sociale dhe me të ardhura të ulëta. Pra, të gjitha pallatet që po ndërtojnë, shumicën prej tyre, njerëzit nuk mund t’i përballojnë. Inflacioni dhe kostoja e jetesës është rritur kaq shumë, dhe kjo është shumë e vështirë për njerëzit.”
Edhe mes votuesve tradicionalë konservatorë në Dartford ka pak entuziazëm për Sunak, i cili zëvendësoi Liz Truss si kryeministre më shumë se një vit më parë.
E vetmja shpresë për konservatorët është se disa votues janë ende të pavendosur se cilën parti do të mbështesin.
“Unë nuk do të votoj. Shumë njerëz nuk do të votojnë”, tha Adam Smart.
Ali Syed, menaxheri i një dyqani picash në afërsi të një rruge, thotë se do të mbështeste laburistët nëse votimi do të bëhej tani, por do të shihte se çfarë do të ofronin konservatorët në muajt e ardhshëm.
“Nëse zgjedhjet do të zhvilloheshin javën e ardhshme. Po, sigurisht, unë nuk do të votoja për konservatorët. Sigurisht që jo. Por nëse konservatorët duan kohën e tyre si për shembull tre, katër ose pesë, gjashtë muaj për të përmirësuar politikat e tyre, atëherë mbase mund të mendoj përsëri. Por Sunak nuk është në një kohë të mirë, nëse zgjedhjet vijnë, jo, në asnjë mënyrë nuk do të zgjidhja konservatorët”, tha Syed.
“Do të preferoja që dikush nga opozita të ishte në krye, sesa konservatorët dhe Rishi Sunak”, tha Ostertag.
Ashtu si kudo tjetër, ka një mospëlqim për figurat aktuale të politikës.
“Unë votoj për konservatorët sepse kur thonë se do të bëjnë diçka, e bëjnë dhe nuk e thonë vetëm për të marrë një votë”, tha Ronald Burnham.
“Kier Staimer është jo shumë popullor, është pak natyrë kontroverse. Por në të njëjtën kohë, mendoj se ndoshta ai do ta përmirësonte pak më shumë situatën se sa Rishi Sunak”, tha GODWIN,
Ende nuk ka një afat të përcaktuar se kur do të mbahen zgjedhjet e ardhshme të përgjithshme.
Me zgjedhjet në SHBA të cilat janë planifikuar të mbahen më 5 Nëntor, kjo do të nënkuptonte përplasjen e fushatave në secilën anë të Atlantikut, një skenar që nuk ka ndodhur në dekada.
Zyrtarët britanikë kanë paralajmëruar qeverinë e Londrës kundër një skenari të tillë për shkak të “rreziqeve të sigurisë”.
Sunak ka refuzuar që zgjedhjet të mbahen në Maj, siç edhe ishte parashikuar nga figura të larta laburiste, dhe ka lënë të kuptohet se mund të zhvillohen në pjesën e dytë të vitit.
Por si funksionojnë zgjedhjet e përgjithshme në Britaninë e Madhe. Mbretëria e Bashkuar është e ndarë në 650 zona, të quajtura zona elektorale. Secili zgjedh një deputet për të përfaqësuar banorët e tij në Dhomën e Komunave në Londër.
Në ditën e zgjedhjeve, votuesit e regjistruar në secilën zonë zgjedhore votojnë për kandidatin e tyre të preferuar në qendrën e tyre të votimit. Shumica e kandidatëve përfaqësojnë një parti të caktuar politike, por disa qëndrojnë si të pavarur.
Sipas sistemit , kandidati që merr më shumë vota bëhet deputet i asaj zone. Pas numërimit të votave, Mbreti i kërkon kreut të partisë me më shumë deputetë të bëhet kryeministër dhe të formojë qeverinë.
Kreu i partisë me numrin e dytë më të madh të deputetëve bëhet kreu i opozitës. Nëse asnjë parti nuk përfundon me shumicën e deputetëve partia më e madhe mund të formojë një qeveri koalicioni me një parti tjetër.
Sipas kësaj marrëveshjeje, deputetë nga të dyja partitë shërbejnë si ministra të qeverisë. Përndryshe, ajo mund të formojë një qeveri të pakicës, duke plotësuar të gjitha rolet ministrore me deputetët e saj, por duke u mbështetur në votat e partive të tjera për të miratuar çdo ligj.
