Partia e Lirisë ka propozuar ndryshime në Kodin Penal, me qëllim mbrojtjen e fëmijëve nga krimet seksuale. Në propozimet e Partisë së Lirisë kërkohet që të shtyhet mosha që marrëdhënia seksuale me të mitur nën 16-vjeç të konsiderohet krim dhe të dënohet me burgim nga dhjetë deri në 15 vite burg. Aktualisht mosha konsiderohet vepër penale kryerja e marrëdhënies me të mitur nën 14 vjeç.
PROPOZIME LIGJORE PËR KODIN PENAL TË REPUBLIKËS SË SHQIPËRISË NGA PARTIA E LIRISë
Neni 100, titulli i nenit dhe përmbatja e tij të ndryshohen si më poshtë:
Neni 100
Marrëdhënia seksuale me fëmijë nën moshën e marrëdhënies seksuale
Kryerja e veprimeve apo marrëdhënies seksuale me fëmijën, që nuk ka mbushur moshën gjashtëmbëdhjetë vjeç, me çdo mjet ose formë, nga i rrituri, dënohet me burgim nga dhjetë gjer në pesëmbëdhjetë vjet.
Kur veprimet ose marrëdhënia seksuale kryhet me dhunë, me çdo mjet ose formë, nga personi që nuk ka mbushur moshën e përgjegjësisë penale dënohet me burgim jo më pak se katër vjet.
Kur veprimet ose marrëdhënia seksuale kryhet në bashkëpunim, më shumë se një herë, me më shumë se një fëmijë, ose kur i janë shkaktuar fëmijës së dëmtuar pasoja të rënda për shëndetin, dënohet me burgim jo më pak se njëzet e pesë vjet.
Kur vepra ka sjellë si pasojë zhdukjen, vetëvrasjen ose vdekjen e fëmijës dënohet me burgim jo më pak se tridhjetë vjet ose me burgim të përjetshëm.
Të shtohet neni 100/a me përmbajtje si më poshtë:
Neni 100/a
Shtytja e fëmijës për të kryer veprime me natyrë seksuale për një të rritur (grooming)
Nxitja, joshja, shtytja, mashtrimi ose manipulimi i fëmijës nën gjashtëmbëdhjetë vjeç, nga i rrituri, me çdo mjet ose formë, për të kryer veprime ose marrëdhënie seksuale, përbën vepër penale dhe dënohet me burgim nga shtatë deri në dhjetë vjet.
Kur këto veprime kryhen nga personi që ka mbushur moshën e përgjegjësisë penale, me çdo mjet ose formë, dënohet me burgim jo me pak se tre vjet.
Kur këto veprime kryhen në bashkëpunim, nga persona që kanë mbushur moshën e përgjegjësisë penale, më shumë se një herë, me një fëmijë më shumë fëmijë, ose kur i janë shkaktuar fëmijës së dëmtuar pasoja të rënda për shëndetin, dënohet me burgim jo më pak se dhjetë vjet.
Kur vepra ka sjellë si pasojë vetëvrasjen e fëmijës dënohet me burgim jo më pak se pesëmbëdhjetë vjet.
Të shtohet neni 100/b me përmbajtje si më poshtë:
Neni 100/b
Komunikimi me fëmijën me mesazhe për qëllime seksuale (Sexting)
Komunikimi me fëmijën nën gjashtëmbëdhjetë vjeç, me mesazhe, foto apo video, me çdo mjet ose formë, që kanë qëllime ose natyrë seksuale, nga personi që ka mbushur moshën e përgjegjësisë penale, përbën kundravajtje penale dhe dënohet me burgim deri në 3 vjet.
Neni 101, emërtimi dhe përmbajtja të ndryshohen si më poshtë:
Neni 101
Marrëdhënia seksuale me dhunë fëmijë mbi 16 dhe nën 18 vjeç
Kryerja e veprimeve apo marrëdhënies seksuale me të miturin mbi gjashtëmbëdhjetë dhe nën tetëmbëdhjetë vjeç, me çdo mjet ose formë, nga i rrituri, dënohet me burgim nga 3 deri në pesë vjet.
Kryerja e veprimeve ose marrëdhënieve seksuale me dhunë, me çdo mjet ose formë, me të miturin e moshës mbi gjashtëmbëdhjetë dhe nën tetëmbëdhjetë vjeç, nga personi që ka mbushur moshën e përgjegjësisë penale, dënohet me burgim nga shtatë gjer në pesëmbëdhjetë vjet.
Kur veprimet apo marrëdhënia kryhet në bashkëpunim ose më shumë se një herë, me më shumë se një fëmijë ose person që nuk ka mbushur moshën tetëmbëdhjetë vjeç, ose kur personit të dëmtuar i shkaktohen pasoja të rënda për shëndetin, dënohet me burgim nga pesëmbëdhjetë gjer në njëzet vjet.
Neni 117, të ndryshojë si më poshtë:
Neni 117 (Pornografia e fëmijëve)
Mbrojtja e femijëve dhe e të miturve nga dhuna dhe shfrytëzimi seksual nga regjistrimet me figurë, imazh dhe me zë
Mbajtja, prodhimi, shfaqja, lejimi, ofrimi, shpërndarja, transmetimi, reklamimi, importimi, shitja apo botimi i materialeve pornografike në mjedise ku ka fëmijë nën moshën 18 vjeç, me çdo mjet ose formë, përbën vepër penale dhe dënohet me burgim deri në shtatë vjet.
Mbajtja, prodhimi, riprodhimi, regjistrimi, importimi, shitja, ofrimi, shpërndarja, transmetimi, shfaqja, shkëmbimi ose përdorimi i materialeve me përmbajtje të dhunës apo marrëdhënies seksuale me fëmijë ose ndërmjet femijeve nën moshën 18 vjeç, me çdo mjet ose formë, nga personi që ka mbushur moshën e përgjegjësisë penale, dënohet me burgim nga dhjetë gjer në pesëmbëdhjetë vjet.
Rekrutimi, shtrëngimi, nxitja, joshja, manipulimi, kërcënimi, detyrimi, dhunimi ose përdorimi i fëmijës nën moshën 18 vjeç, për të marrë pjesë në veprime ose shfaqje me natyrë seksuale, me çdo mjet ose formë, dënohet me burgim nga dhjetë deri në pesëmbëdhjetë vjet.
Përdorimi i imazhit të femijës, të vertetë ose të gjeneruar nga teknologjia, ku fëmija angazhohet në veprime ose marrëdhënie seksuale, për prodhim, riprodhim, shpërndarje, reklamim, transmetim, shkëmbim, shfaqje, mbajtje, përdorim personal, shitje ose botim, me çdo mjet ose formë, përbën vepër penale dhe dënohen me me burgim nga tre deri në pesë vjet.
Përjashtohen nga përgjegjësia penale vetëm personat dhe subjektet që, në bazë të ligjit dhe me autorizim nga Policia e Shtetit, punojnë apo angazhohen në mbrojtje të fëmijës nga dhuna seksuale. (PËR TU DISKUTUAR!)
