Udhëheqësi serb i Bosnjës Milorad Dodik sulmoi dje Ndihmës Sekretarin e Shtetit të SHBA-Së, James O’Brien, duke e quajtur atë një “gënjeshtar” dhe “ngatërrestar”, pasi diplomati me ndikim i SHBA kishte kritikuar më parë Dodikun dhe politikat e tij secesioniste dhe minimin e Dejtonit. I pakënaqur dukshëm me akuzat e O’Brien, Dodik u tha gazetarëve në Banja Luka se ndihmës sekretari i shtetit i SHBA mbërriti në BiH si një “subjekt mysliman”. “Ai ishte një shkarravitës i zakonshëm që pati fatin që e gjeti veten në Dejton,” tha Dodik për O’Brien, i cili ishte një nga pjesëmarrësit aktivë në negociatat e paqes në Dejton dhe, si avokat, ishte i përfshirë në krijimin e marrëveshjes së paqes, që i dha fund luftës tre vjeçare e gjysmë në Bosnje dhe Hercegovinë. Gjatë vizitës së tij në Sarajevë, ai dërgoi një mesazh se SHBA nuk do të lejojë të kërcënohet integriteti territorial dhe integriteti i Bosnjë-Hercegovinës dhe se do të kundërshtojë me vendosmëri çdo politikë shkëputëse. “Ne do t’i përgjigjemi veprimeve anti-Dejton dhe antikushtetuese dhe nuk do të lejojmë që aktorët keqdashës të përçajnë vendin,” tha O’Brien. Dodik, nga ana tjetër, vlerësoi se ndihmësi i sekretarit amerikan të shtetit “paraqitet si i fuqishëm” dhe se ai erdhi në BiH për ta bërë atë një pikë të re të krizës. Ai thotë se O’Brien është një “ngatërrestar” i cili nuk është i autorizuar të interpretojë Marrëveshjen e Dejtonit sepse kjo e drejtë u takon vetëm palëve nënshkruese. Ai pretendon se prapa politikës amerikane qëndron qëllimi i centralizimit të BiH në interesat e boshnjakëve dhe se RS nuk do të mbetet në “BiH antikushtetuese”, pavarësisht se çfarë thonë për këtë në Uashington.
