Elita e futbollit anglez është në raundin e 24-t. Kjo e shtunë sportive nisi në orën 13:30, aty ku Manchester City iu fal dopietës së Haaland për të mundur 2-0 Evertonin. Te fitorja doli edhe Liverpool, që mposhti 3-1 Burnleyn dhe rimerr kreun e klasifikimit.
Në Londër, Fulhami mposhti 3-1 Bournemouth. Për vendasit në fundin e sfidës për 16 minuta u aktivizua edhe Armando Broja, që ende nuk e ka një vend titullari. Në stol qëndroi Strakosha, me Brentford që fitoi 0-2 me Uolves. Tri pikë për “infarkt” edhe Tottenham, që mundi 2-1 Brighton. Goli i suksesit për Spurs u shënua nga Johnson në të 90+6 minutë.
Në “Etihad”, Manchester City mundi 2-0 Evertonin jo pa mundime. Rikthimi pas 77 ditësh i Haaland ishte i duhuri për “Qytetarët”, me norvegjezin që është një “makineri golash”. U deshën 14 minuta kohë në pjesën e dytë që Haaland të shënonte dy gola dhe të shkonte në kuotën e 73 golave në 78 ndeshjet me Cityn.
Pas humbjes 3-1 nga Arsenali në Londër gjashtë ditë më parë, Liverpooli u rikthye te suksesi dhe për raundin e 24-t në Premier League mundi në “Anfield” 3-1 Burnleyn. Sfida nuk u diskutua nga të kuqtë, që kaluan në epërsi qysh në minutën e 31-të me Diego Jota. Më pas O’Shea ia doli që të barazonte në fundin e pjesës së parë. Fraksioni i dytë nisi mirë për djemtë e Klopp, që shënuan me Luiz Diaz dhe Nunez në minutat 52 dhe 79. Me 54 pikë, të kuqtë janë në vendin e parë të renditjes, dy pikë më shumë se Manchester City ndjekës. “Qytetarët” e Guardiolës kanë një ndeshje më pak.