Shkodra tashmë njihet për traditën e organizimit të karnavaleve, ku çdo vit mbahen para periudhës 40 ditore të Krezhmeve Katolike, ndërkohë kryebashkiaku i Shkodrës Benet Beci ka njoftuar se festimet do të zhvillohen në datat 23-24-25 shkurt, brenda 40 ditëve të Krezhmeve para festës së Pashkëve.
Për këtë ka reaguar ashpër këshilltarja demokrate në Bashkinë Shkodër, Eliona Kodra Shkreli, ku e cilëson një veprim skandaloz, duke u shprehur se nga ana e kreut të bashkisë, është një provokim i pastër, dashakeqës dhe fyes.
Ajo më tej e ka krahasuar Becin me ish presidentin e Turkmenistanit Saparmurat Niyazov, i cili sipas saj ai i emëronte muajt e vitit sipas emrave të familjes së tij.
Postimi plotë i Shkrelit:
“Kryebashkiaku Beci si ish presidenti Niyazov, ndryshojnë simbolikat sipas dëshirave personale…
Administrata e re e Bashkisë Shkodër, servir çdo ditë nga një skandal të ri duke I ra’ ndesh traditave shekullore të Shkodrës dhe duke fyer komunitete të caktuara.
Nuk e di a bëhet me qëllim apo nga mungesa e njohurisë së historikut të Shkodrës por di që kur gabimi përsëritet, atëherë bëhet faj i qëllimshëm.
Kryebashkiaku I Shkodrës, njoftoi në rrjetin e tij social se Karnevalet e Shkodrës (organizim mbi njëqind vjeçar I këtij qyteti të lashtë) do zhvillohen në datat 23-24-25 shkurt, brënda 40 ditëve të Krezhmeve para festës së Pashkëve.
Kush e njeh Shkodrën dhe historinë e Saj, e din e se Karnavalet organizohen para Krezhmeve, dhe këtë traditë s’ka guxuar askush t’a prekë por e ka respektuar atë duke iu përshtatur datave.
Karnevalet janë një festim i krishterë, festimet e të cilave në Shkodër datojnë që në vitet 1860. Zanafilla e festimeve të këtij aktiviteti mori emrin “Carnem-levare” (festimi para periudhës 40 ditore të Krezhmeve ku heqja e mishit asht’ e detyrueshme).
Transformimi I simbolikës së Karnevaleve, është fyerje ndaj komunitetit katolik duke thelluar skandalet që ka prodhuar administrata e re e Bashkisë në kaq pak muaj qeverisje lokale ndaj këtij komuniteti.
Kur nuk njeh traditat e historinë e qytetit, gabimet janë të pashmangshme. Por kur këto gabime përsëriten atëherë kemi të bëjmë me faje të qëllimta, povokime të pastra, dashakeqëse dhe fyese.
Karnevalet kanë një simbolikë dhe nisin para nisjes se Krezhmeve Katolike, të martën para të mërkurës së përhime (që këtë vit është me 14 shkurt).
Koha e diktatorëve ka ikur dhe prekja e simbolikave fetare në Shkodër ngjall revoltë të brëndshme e cila të kthehet mbrapsht atëherë kur nuk e pret.
Zoti kryetar I Bashkisë Shkodër mos u bëj si ish presidenti i Turkmenistanit Saparmurat Niyazov, i cili i emëronte muajt e vitit sipas emrave të familjes së tij. Shkodra nuk është pronë private, por është kryeqendra e të gjithë veriorëve…”, shkruan këshilltarja demokrate Eliona Kodra Shkreli.
