Bashkisë së Shkodrës në kuadër të projekteve të qeverisë për t’i dhënë ndërtesave historike ngjyrat e ‘partisë’, nuk i ka shpëtuar as kinemaja e qytetit, ku para disa kohësh kryeministri Rama nepërmjet një postimi në rrjetet sociale, njoftoi transformimin e saj.
Sot opozita ka publikuar fotot nga përfundimi i ‘transformimit’ të kinemasë së vjetër të qytetit, ku duket se e gjithë fasada, siç edhe pritej, tashmë ka marrë ngjyrën ‘mavi’.
Për këtë ka reaguar ashpër këshilltarja demokrate e Bashkisë Shkodër, Eliona Kodra Shkreli, ku e cilëson si një pamje të shëmtuar, duke hedhur akuza se është shkelur transparenca mbi punimet.
Reagimi nga Eliona Kodra Shkreli:
“Pamja e shëmtuar e Kinemasë së Shkodrës nën epokën Benetiane!
Kjo bojatisje pa pikë shije dhe ngjyre është vizioni I ri për Shkodrën?
Përveç të gjitha shkeljeve të punimeve dhe aspak transparente (mungesa e tabelës informuese) ndaj Këshillit Bashkiak dhe ndaj qytetarëve që janë pronarët e vërtetë të Shkodrës, tani përballemi me një ngjyrë rilindase e cila stonon në mënyrë të shëmtuar me këtë godinë karakteristike të Shkodrës, monument kulture!
Xhanëm, si mund të presësh që një grup njerëzish të ardhur nga Tirana të dinë të ruajnë apo të mbrojnë identitetin e trashëgiminë e Shkodrës, apo qoftë të ruajnë balancat e harmonitë karakteristike shekullore të Shkodrës? Janë të njëjtit njerëz që festimet e Karnevaleve i futën në mes Krezhmeve Katolike, duke ‘thyer’ një traditë të shekullore…”, shkruan këshilltarja demokrate në reagimin e saj.
