Ministri i Brendshëm Taulant Balla, i ftuar në një intervistë televizive, tha që ligji i ri për Policinë e Shtetit do të energjizojë karrierën në mënyrë që ajo të jetë me meritë dhe vlerësimi i performancës të bëhet siç duhet. Balla theksoi se drejtësia e re është në një test me hetimin e dy çështjeve, “Gërdecit” dhe “21 janarit”. Ministri i Brendshëm tha se “Tempulli” dhe “Sundimi i Ligjit” janë operacione që do të vazhdojnë.
I pyetur nëse ka Shqipëria më shumë rend dhe siguri me të në krye të Ministrisë së Brendshme, Balla tha:
“Viti 2023 në shumë indikatorë është një vit që ka shënuar nivelin më të mirë të sigurisë, që nga koha kur mbahen të dhëna, në kuptimin e këtyre 30 viteve. Policia e Shtetit ka ndërmarrë një sërë operacionesh kombëtare sa i përket goditjes kryesisht të grupeve kriminale që merren me shpërndarjen e lëndëve narkotike, por edhe për të adresuar një prej atyre shprehjeve më të dukshme të arrogancës ndaj shtetit, siç është armëmbajtja pa leje, apo gjetjes dhe vendosjes para drejtësisë së personave në kërkim. Policia e Shtetit ka një plan të qartë pune, mbi bazën e të cilit po merr sukseset e shumëpritura nga mbarë opinioni publik”.
Duke folur mbi marrëveshjen e emigrantëve me Italinë, Balla tha se anëtarësimi në BE kërkon edhe marrjen e përgjegjësive.
Ne po i japim një mbështetje Italisë që të përballet me një situatë shumë të vështirë. Shqipëria po merr përsipër të kontribuojë me një përqindje shumë të vogël për akomodimin. Qendra si e Shëngjinit në Itali janë me dhjetëra të tilla. Janë 80 mijë që gjenden në këto qendra, vetëm 3 mijë do akomodohen në Shqipëri. Anëtarësimi në BE është edhe të marrësh përgjegjësi, dhe Shqipëria e ka dëshmuar”.
Duke u ndalur te akuzat e Berishës lidhur me kallëzimin e bërë prej tij dhe hetimin e çështjeve të bujshme nga drejtësia, Balla u shpreh:
“Drejtësia po jep shembullin kuptimplotë të hetimeve të thella të akteve të rënda korruptive që kanë ndodhur në këto vite. Këshilla ime është që të lëmë drejtësinë të bëj punën e vet. Kjo është përgjigjja ime, jo vetëm për Berishën, por për të gjithë të tjerët.
21 janari është sfida më e madhe e drejtësisë shqiptare. Momenti më i rëndësishëm në këtë sfidë është vendimi i Gjykatës Europiane për të Drejtat e Njeriut, e cila është edhe epikriza dhe përshkrimi më i plotë që i është bërë asaj ngjarje të rëndë të 13 viteve më parë, që s’është hetuar nga drejtësia shqiptare, sikurse citon gjykata, dhe ka parashtruar hapat që duhet të ndjekë institucioni i Prokurorisë në Republikën e Shqipërisë, për t’i shkuar deri në fund, ku më shumë se sa puna që po bën Policia Shkencore Italiane sa i përket predhës së administruar, në trupin e pajetë të njërit nga 4 dëshmorët e 21 janarit, thelbi është urdhër-dhënia, e cila çoi në një kasaphanë, në një tragjedi, ku unë besoj që institucionet e drejtësisë në Shqipëri, sikurse vendimet e Gjykatës Europiane të të Drejtave të Njeriut janë detyruese, ne sot kemi një vendim gjykate që duhet zbatuar.
Për rastin në fjalë po bëhet procedura sipas gjithë teknologjisë më të fundit, për të ndërlidhur llojin e armës me llojin e predhës, për të identifikuar autorin në rastin në fjalë, por vendimi i gjykatës vendos në krye të thelbit të kësaj çështje urdhër-dhënien. Pse thotë gjykata s’janë hetuar urdhëruesit. Në këtë aspekt duhet të jetë një fokus, dhe veprimet e tjera që janë bërë për të penguar drejtësinë që nga momenti i parë i ngjarjes. Në kushtet e reja, kur Shqipëria ka bërë të mundur të ketë të konfirmuar një sistem gjyqësor, dhe mbi të gjitha një Prokurori të Posaçme të pavarur, atëherë është testi i këtyre institucioneve të reja të drejtësisë është Gërdeci dhe 21 janari”.
Ai shtoi se Antimafia Italiane me Policinë Shqiptare ka numrin më të madh të operacioneve të përbashkëta.
Lidhur me ligjin e ri për Policinë e Shtetit, ai shtoi:
“Ajo që për mua ka shumë rëndësi është ndryshimi i sistemit, energjizimi i karrierës brenda Policisë së Shtetit. Vlerësimi i peformancës siç duhet. Karriera në Policinë e Shtetit s’duhet bërë më bazuar në ndërhyrje dhe vlerësimi jo profesionale, dhe prandaj ligji i ri për Policinë e Shtetit do ta çojë Policinë e Shtetit në një nivel tjetër, për të shkuar në majën e besimit të shqiptarëve”., përfundoi ministri Balla.
