Nuk është e pazakontë. Siç ndodh e siç promovohet në Shqipëri bashkëjetesa dhe harmonia ndërfetare, rrallë gjen në vend tjetër.
Edhe pse në dukje i lodhur për shkak të moshës, kryepeshkopi i Kishës Orthodhokse, hirësia e tij Janullatus, priti të shtunën në Kishë Sekretarin e Përgjithshëm të Ligës Islame, Muhamed Bin Abdulkerim el-Isa të cilin e shoqëronte edhe kreu i Komunitetit mysliman në vendin tonë Hirësi Bujar Spahiu.
Ulur “këmbëkryq” në Kishë, orthodhoksë e myslimanë folën gjatë për luftën kundër ekstremizmit, radikalizimit të dhunshëm në botën myslimane, thuhet në njoftimin e sjellë nga Kisha për këtë takim.
Janullatusi duke i dhënë rëndësi vizitës, kishte me vete Mitropolitin e Fierit, Hiresi Nikollën, Mitropolitin e Amantias Hirësi Nathanailin, Episkopin e Bylisit, Hirësi Astin dhe një delegacion të gjerë kishtarësh.
Sekretari i Përgjithshëm i Ligës së Botës Islame vlerësoi gjithashtu kontributin e Fortlumturisë së Tij Kryepiskopit Anastas dhe Kishës Orthodhokse Autoqefale të Shqipërisë në promovimin dhe kultivimin e harmonisë, dhe tolerancës fetare në vend duke e shndërruar Shqipërinë në një model të shkëlqyer në botë, të bashkëjetesës harmonike midis feve të ndryshme.
Kryepiskopi Anastas fillimisht vlerësoi bashkëpunimin vëllazëror me kreun e Komunitetit Mysliman të Shqipërisë Hirësinë e Tij z. Bujar Spahiu si edhe me drejtuesit e tjerë fetarë në vend dhe më pas theksoi se: “Në kohët e sotme shoqëria ka shumë njuhuri dhe shumë ide por ka një mungesë të dashurisë dhe respektit për të vërtetën. Edhe ne së bashku duhet që të themi se realiteti real në këtë univers është Perëndia dhe jo diçka tjetër. Unë besoj se kjo është një vlerë e përbashkët për ne në kohët e sotme dhe duhet ta theksojmë këtë.
Në botën Orthodhokse ekziston një marrëdhënie e vazhdueshme me vëllezërit tanë myslimanë dhe duhet të punojmë që të mos mbetemi thjesht në një miqësi sipërfaqësore por në një marrëdhënie të sinqertë dashurie dhe bashkëpunimi real. Sa më shumë i afrohemi Zotit aq më shumë afrohemi edhe me njëri – tjetrin dhe anasjelltas, sa më shumë afrohemi me njëri – tjetrin aq më shumë afrohemi me Perëndinë”.
Në fund të takimit u shkëmbyen edhe dhurata.
Sekretari i Përgjithshëm i Ligës së Botës islame Shkëlqesia e Tij, z. Muhamed Bin Abdulkerim el-Isa dhe delegacioni që e shoqëronte vizituan edhe katedralen “Ngjallja e Krishtit” në Tiranë.
