Janë shfaqur video që tregojnë burra në kufirin midis Serbisë dhe Maqedonisë së Veriut duke u detyruar të zhvishen në errësirë dhe të ecin në të ftohtë. Pamjet e shfaqura për Guardian nga Legis, një OJQ e Maqedonisë së Veriut, tregojnë një varg burrash gjysmë të zhveshur.
Legis raporton se videot janë realizuar nga një vendas në afërsi të fshatit Lojanë, afër kufirit me Serbinë. Organizata joqeveritare pretendon se incidenti është rasti i dytë brenda një dite i sjelljeve të tilla poshtëruese ndaj emigrantëve. Policia kufitare serbe detyroi mbi 50 persona të zhvisheshin lakuriq ose të vishnin të brendshme, më pas i ndoqi përsëri në Maqedoninë e Veriut. Legis më vonë kontaktoi me njerëzit dhe përcaktoi se ata ishin sirianë.
Jasmin Rexhepi president i Legis, tha se policia gjoja sillet në mënyrë strikte sepse dëshiron të parandalojë kontrabandën e njerëzve.
“Këto incidente u shfaqën pikërisht kur BE po përgatit kufizime për emigrantët, disa ditë pas samitit BE-Serbi për bashkëpunimin kufitar. Tani ne shohim efektin dhe pasojat e drejtpërdrejta,” tha ai. Ai shtoi se ky është rasti i parë i tillë në këtë kufi.
Radosh Gjuroviq, drejtor i Qendrës për Mbrojtje dhe Ndihmë për Azilkërkuesit, tha se që nga fillimi i vitit, stafi i azilit ka vërejtur një numër të shtuar të migrantëve që kthehen nga kufiri serb në Maqedoninë e Veriut. “Mund të thuhet se tashmë është një praktikë e rregullt”, tha ai.
Dunja Mijatovic, Komisionerja për të Drejtat e Njeriut në Këshillin e Evropës, tha: “Raportet e reja mbi sjelljen e policisë serbe në kufirin me Maqedoninë e Veriut, e cila supozohet se është e dhunshme dhe poshtëruese dhe madje përfshin vjedhje nga migrantët, kërkojnë një raport të shpejtë dhe efektiv”.
“Këto incidente nuk janë vetëm shqetësuese, por tregojnë një tendencë më të gjerë në anëtarët e Këshillit të Evropës,” tha ajo.
“Këto akte shkelin Konventën Evropiane për të Drejtat e Njeriut, si dhe standardet e tjera ndërkombëtare që kërkojnë që azilkërkuesit të kenë kujdes. Ajo që kam vënë re dhe për të cilën kam paralajmëruar prej kohësh është se emigrantët i janë nënshtruar trajtimeve poshtëruese në disa vende evropiane për vite me radhë”.
Rexhepi i bëri thirrje Zyrës së Ombudsmanit të Maqedonisë së Veriut dhe Serbisë që të kryejë një hetim dhe të lejojë organizatat joqeveritare të monitorojnë operacionet policore. Policia serbe nuk ka dashur të komentojë situatën
