Arrestohet një person dhe procedohen në gjendje të lirë dy të tjerë për vepra penale të ndryshme në Elbasan. Arrestimi ka ardhur si pasojë e humbjes së kontrollit të mjetit që drejtonte 23-vjeçari me inicialet S.I, duke shkaktuar dëme materiale në një lokal. Dy të rinjtë që po procedohen penalisht kanë kryer veprat penale: posedim lëndësh narkotike dhe kanosje. Prokuroria e Elbasanit do të merret me veprimet e mëtejshme për secilin rast.
Njoftimi i Policisë:
DVP Elbasan
Specialistët e Seksionit për Hetimin e Krimeve ndaj Personit, në bashkëpunim me ata të qarkullimit rrugor, vunë në pranga shtetasin S. I., 23 vjeç, banues në Peqin, pasi mesditën e djeshme, në qytetin e Peqinit, dyshohet se për shkak se ka humbur kontrollin, automjeti që drejtonte ky shtetas ka shkaktuar dëme të vogla materiale në ambientet e jashtme të një lokali. Gjithashtu, gjatë shoqërimit shtetasi S. I. ka kundërshtuar punonjësit e Policisë.
Specialistët për Hetimin e Narkotikëve referuan materialet në Prokurori, ku nisi procedimi në gjendje të lirë për shtetasin B. A., 20 vjeç, banues në Elbasan, pasi iu gjet dhe iu sekuestrua një sasi të vogël lënde narkotike cannabis sativa.
Specialistët për Hetimin e Krimeve të Komisariatit të Policise Elbasan referuan materialet në Prokurori, ku nisi procedimi në gjendje të lirë për shtetasin Xh. Gj., 23 vjeç, banues në fshatin Tregan, pasi dyshohet se për motive të dobëta, ka kanosur një 17-vjeçare.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Elbasan, për veprime të mëtejshme.
