Opera “Goca e Kaçanikut” ngjitet këtë mbrëmje në skenë. Vepra e kompozitorit Rauf Dhomi nga Opera e Kosovës vjen me regji nga Nikolin Gurakuqit. Opera “Goca e Kaçanikut” do të vijë në skenë me një gjuhë bashkëkohore jo folklorike. Opera e kompozitorit të njohur kosovar Rauf Dhomi është me libret të Ajmone Dhomit dhe Jusuf Buxhovit. Opera e parë kosovare premierë botërore në Kosovë, ku për publikun shfaqet në sallën AMC në Prishtinë. Për këtë vepër ka reaguar dhe regjisori Nikolin Gurakuqi, që e quan një ngjarje historike. “Suksese të gjithëve në këtë ngjarje të madhe historike, dirigjentit, skenografit, kostumografes, korit, orkestrës, solistëve, figurantëve, teknikës e veçanërisht stafit drejtues me z. Meriton Ferizi në drejtim administrativo artistik. Suksese të mëtejshme operas së re të Kosovës”, shprehet regjisori, që shton se opera do të ndiqet këtë mbrëmje dhe nga kryeministri i Kosovës z. Albin Kurti. Në këtë vepër bëhet fjalë për luftën kundër pushtuesve osmanë në anën e Kaçanikut dhe dashurinë e dy të rinjve: Trimorit dhe Pafikës. Këta dy ëndërrojnë për një jetë të lirë dhe të lumtur. Mirëpo tradhtari Rus Bashi i pengon, duke e akuzuar Trimorin për tradhti. Trimori burgoset, kurse Rus Bashi tenton ta rrëmbejë Pafikën. Në ndërkohë shokët e lirojnë Trimorin. Në momentin kur Rus Bashi e sulmon Pafikën, paraqitet Trimori, ndërsa Pafika arrin ta vrasë tradhtarin. Të gëzuar, të gjithë i këndojnë lirisë e dashurisë. Rauf Dhomi është autor i shumë operave, meshave, kantatave, muzikës simfonike, partiturave filmike dhe muzikës teatrore. Rolet në vepër interpretohen nga: Pafika – Adelina Paloja, Trimori- Ismet Vejseli, Plaku – Hektor Leka, Plaka – Besiana Mehmeti, Teuta Kurti; Rusbashi – Harris Bajraktari; Kasneci – Rizah Jahaj; Fiqali – Hekuran Bllaca; Agjenti – Etrit Nura; 3 shoqet- Aurela Krasniqi, Elona Sadiku, Donika Kovani Elvira Mazhiqi, Fiona Shabani, Leila Nika. Në këtë vepër është aktivizuar edhe Baleti Kombëtar i Kosovës.
