Presidenti i SHBA-ve, Joe Biden planifikon të takohet me udhëheqësit e Kongresit të martën për të diskutuar financimin e qeverisë pasi një afat i pjesshëm mbylljeje afrohet të premten. Biden do të takohet me demokratët dhe republikanët kryesorë nga Dhoma dhe Senati të martën, ku presidenti do të diskutojë “urgjencën” e miratimit të një projektligji për financimin e qeverisë para mesnatës së së premtes. Ai gjithashtu ka në plan të diskutojë një projekt-ligj të bllokuar të sigurisë kombëtare që ofron ndihmë për Ukrainën, Izraelin dhe Tajvanin. Takimi vjen pasi ligjvënësit mbeten në ngërç për të shmangur një mbyllje.
Udhëheqësi i shumicës në Senat, Chuck Schumer, tha në një deklaratë të dielën se ende nuk kishte marrëveshje dhe i bëri thirrje kryetarit të Dhomës së Përfaqësuesve, Mike Johnson, një republikan, të “përshpejtojë” dhe të arrijë një kompromis dypartiak, pavarësisht kundërshtimeve nga ligjvënësit më konservatorë të partisë së tij.
