Imazhet e dhjetëra tifozëve të Lazios në Hofbräuhaus, sallën e famshme të birrës së Mynihut të dashur për Adolf Hitlerin, po bëjnë xhiron e botës dhe shkaktojnë protesta dhe indinjatë të mëdha.
Në Gjermani për të parë ndeshjen e Ligës së Kampionëve kundër Bayernit, tifozët e bardhekaltërve u përjetësuan nga disa video që i portretizojnë duke lavdëruar Duçen dhe duke dhënë përshëndetjen naziste në vendin historik të një prej mitingjeve të para të diktatorit nazist.
Pikërisht brenda këtyre mureve në vitin 1920 Hitleri shpalli manifestin e Partisë Kombëtare Socialiste të Punëtorëve Gjermanë, duke deklaruar 25 pikat e programit të tij dhe duke filluar në mënyrë efektive sezonin e terrorit dhe dhunës që kulmoi me zhdukjen e hebrenjve dhe Luftën e Dytë Botërore.
