Gjykata e Apelit ka lënë në fuqi vendimin e Gjykatës së Shkallës së Parë për dënimin me 12 vite burg të ish-punonjësit Informativ Kombëtar Hektor Voci i cili në vitin 1997 vrau policin A.C.
Në vitin 2000 gjykata e Krujës e dënoi me burgim të përjetshëm, vendim që u ankimua nga Hektor Voci pasi u ekstradua nga Britania e Madhe. Kolegji i Gjykatës së Lartë në 2022-in ktheu çështjen për rigjykim.
Gjykata e Tiranës në nëntor të vitit 2023, caktoi 18 vite burg për ish-punonjësin e SHIK, vendim që sërish u apelua dhe përfundimisht sot u la në fuqi duke i reduktuar një të tretën e dënimit, që e çon dënimin e tij përfundimtar në 12 vite burg.
Si ndodhi ngjarja në 1997-ën:
Në datë 10.02.1997, shtetasi me iniciale Hektor Voci, punonjës i SHIK, ka qenë duke udhëtuar për arsye pune, në segmentin Tiranë – Fushë-Krujë, me kamion tip Benz si pasagjer dhe makina po drejtohej nga shtetasi me iniciale B. Xh, punonjës i SHIK. Ky i fundit ka parakaluar në mënyrë të gabuar duke vënë në rrezik automjetin që drejtohej nga shtetasi A. C, punonjës policie pranë Komisariatit Nr. 4, në Tiranë. Punonjësi i policisë, shtetasi me iniciale A. C i ka ndjekur me makinë dhe i ka ndaluar ata pranë fshatit Tapizë. Ai ka dalë nga automjeti i tij dhe është afruar duke mbajtur në dorë armën e shërbimit tek kaminoni ku ndodhej i pandehuri Hektor Voci. Ky i fundit e ka qëlluar me automatikun e shërbimit duke e vrarë.
