Policia turke arrestoi 33 persona të dyshuar për lidhje me grupin e Shtetit Islamik, të cilët dyshohet se po përgatisnin sulme përpara zgjedhjeve lokale të vendit më vonë këtë muaj, tha të dielën ministri i Brendshëm Ali Yerlikaya.
Të dyshuarit “po përgatiteshin dhe po kërkonin veprime përpara zgjedhjeve të ardhshme lokale”, postoi ai në X, dikur Tëitter. Zgjedhjet mbarëkombëtare do të mbahen më 31 mars.
Policia kundër terrorizmit në Sakarya në veriperëndim të Turqisë gjeti armë, para dhe “dokumente organizative” gjatë bastisjeve.
“Ne nuk do të tolerojmë asnjë terrorist. Ne do të vazhdojmë luftën tonë pandërprerë me përpjekjet superiore të forcave tona të sigurisë”, tha Yerlikaya, raporton Associated Press.
Rrjeti po siguronte personel për zonat e luftës dhe mbështetje financiare për IS-in ndërsa operonte nga xhamitë dhe shkollat fetare ilegale, tha ai.
Turqia ka pësuar sulme të shumta të lidhura me IS gjatë 10 viteve të fundit, duke përfshirë një sulm me armë në një kishë në Stamboll në janar që la një person të vdekur.
Grupi ishte gjithashtu i lidhur me sulmin më vdekjeprurës të vendit, në të cilin më shumë se 100 u vranë në një tubim paqeje në Ankara në tetor 2015.
