Së bashku me vëllanë dhe dy shokë ai shkon në një lokal mbushur me njerëz, por vritet nga një breshëri të shtëna armësh. E gjithë kjo dyshohet se ndodhi për një grua, por hetuesit kanë dhe një tjetër pistë mbi tregtinë e drogës dhe prostitucionim. Bëhet fjalë për për përplasjen e dy bandave shqiptare në Frosinone mbrëmjen e të shtunës.
Mediet italiane kanë zbardhur dinamikën e masakrës. Për Kasem Kasmin, 27-vjeçarin shqiptar, i njohur si Carletto, nuk pati shpëtim.
Një bashkatdhetar Mikea Zaka , 23 vjeç, u arrestua me akuzën e vrasjes.
“Kam qëlluar për t’u mbrojtur”, ka rrëfyer ai para hetuesve që e kanë marrë në pyetje deri në orët e vona të natës.
I riu Zaka, ishte rrahur disa herë nga kundërshtarët pasi po njihte një vajzë. Krahasuar me dinamikën e hetimeve të para skena e krimit të ndodhur në “Shake bar”, duket se gjithçka po përmbyset.
Pak para orës 19:30 në rrugën Aldo Moro, teksa plot të rinj dhe familje ishin për shëtitje, mbërriti një makinë Lancia e bardhë. Katër të rinj kanë zbritur nga makina: Kasemi, vëllai i tij Ervini dhe dy shokë. Me një ritëm të shpejtë ata u drejtuan drejt pesë bashkatdhetarëve të tjerë të ulur në një tavolinë në ambientin e jashtëm të lokalit. Pati një debat, pastaj një seri të shtënash.
VIDEO- TË SHTËNAT
Skena u filmua nga kamerat e lokalit: të shtënat ishin të paktën gjashtë, ndërsa klientët të tmerruar u fshehën poshtë tavolinave para se të iknin. Sipas dinamikës së zbardhur nga policia, ka qëlluar Mikea Zaka me një pistoletë të kalibrit 22. Shumica e të shtënave kanë përfunduar në drejtim të Kasemit, me plumba në mes barkut, kraharorit dhe qafës.
27-vjeçari u rrëzua dhe vdiq pas rreth njëzet minutash në duart e mjekëve. Vëllai i viktimës dhe dy shokë të tjerë u qëlluan gjithashtu.
ARRATISJA-VETËDORËZIMI
Mikea iku në këmbë, në drejtim të Scalo dhe e hodhi armën në lumin Cosa. Ndërkohë policia kishte tashmë emrin e tij dhe i shkoi në shtëpi, në banesat publike në Casermone. 23-vjeçari, ndoshta edhe nga frika e hakmarrjes nga grupi i viktimës, së bashku me avokatin e tij Marco Maietta, janë vetëdorëzuar në komisariat rreth orës 22:00.
“Kam qëlluar për t’u mbrojtur”, ka rrëfyer ai para hetuesve, duke treguar edhe pikën në lumë ku kishte hedhur armën. Kërkimet për gjetjen e armës vijojnë.
MOTIVI E PËRPLASJES
Dhe vijmë te motivi. Pas të shtënave nuk do të qëndronte një çështje droge, por një histori e lidhur me një vajzë me të cilën 23-vjeçari kishte një lidhje. Një marrëdhënie e refuzuar nga grupi i shqiptarëve të tjerë që kishin rrahur tashmë në raste të tjera bashkatdhetarin e tyre, duke e paralajmëruar që ta linte të qetë dhe të mos e shihte më. Ndoshta kjo është edhe arsyeja pse i riu ka qarkulluar i armatosur. Prokurori Antonio Guerriero dhe komisioneri i policisë Domenico Condello supozojnë një luftë mes bandave për drogën dhe prostitucionin. I arrestuari, sipas hetimeve të tjera të policisë, njihet si shpërndarjes droge në banesat publike të Casermone. Ndërkohë gjendja e tre të plagosurve mbetet e stabilizuar, nga të cilët dy janë të shtruar në Frosinone dhe një në Umberto i në Romë.
