15 marsi është afati i fundit për mbylljen e hetimit për dosjen e koncesionit të sterilizimit. Hetimi nga SPAK, ka të bëjë me shkeljet që pretendohet se ish-ministri Ilir Beqaj ka kryer në koncesionin e sterilizimit me vlerë 100 milionë euro dhe afat 10 vjeçar të fituar nga biznesmeni Ilir Rrapaj, i cili tashmë ndodhet i arrestuar së bashku me ish-zv/ministrin e Shëndetësisë, Klodian Rrjepajn.
3 firmat që mund të fundosin Ilir Beqajn
Pozitat e tij mund të tronditen, pasi Ilir Beqaj ka qenë iniciatori kryesor i këtij koncesioni sterilizimi, duke filluar që nga hapja e procedurës dhe mbyllja e kësaj procedure që është firmosja e kontratës. Në total është njeriu që ka hedhur 3 firma kryesore të këtij koncesioni me qëllim për ta fituar Ilir Rrapaj. Janë 3 dokumente“bombë”, ku Ilir Beqaj në cilësinë e Ministrit të Shëndetësisë, ka firmosur gjatë periudhës 2015, kohë kur zhvillohej procedura koncesionare për sterilizimin e pajisjeve kirurgjikale. Dokumentet ngrenë dyshime të arsyeshme mbi përgjegjësinë penale të “Shpërdorimit të detyrës” nga ana e ish-ministri Beqja, për të cilin SPAK ka ndarë hetimet dhe kryen verifikime më të gjëra. Tre dokumentet në ditët në vijim mund të sjellin ngritjen e akuzës zyrtare për ish-ministrin e Shëndetësisë.
Detajet
Dokumenti i parë që implikon dhe bën protagonist kryesor Ilir Beqjan në konçesionin e sterilizimit është pikërisht dokumenti që ministri ka firmosur, për hapjen e procedurës së konçesionit 10 vjeçar. Në cilësinë e titullarit Beqja ka hapur procedurën dhe njëherësh përmes një urdhri të brendshëm, ka formuan grupin e njerëzve me në krye Klodian Rrjepaj, për formimin e Komisionit të Vlerësimit të Ofertave. Procedura e koncesionit 10 vjeçar me vlerë 9.6 miliardë lekë është hapur në 13 shkurt 2015, me një vendim të ministrit Ilir Beqaj. Objekti i kontratës së partneritetit publik-privat kishte për qëllim ofrimin e setit të personalizuar të instrumenteve kirurgjikalë sterilë, furnizimin me material mjekësor steril njëpërdorimësh në sallat kirurgjikale, trajtimin e mbetjeve me rrezik biologjik dhe dezinfektimin e sallave kirurgjikale dhe ambienteve. Sipas dokumenteve më datën 4 Maj 2015, Ministria e Shëndetësisë ka zhvilluar procedurën e prokurimit për koncesionin dhe në datë 26 Maj, autoriteti kontraktues ka publikuar renditjen e operatorëve ekonomikë. Sipas këtij dokumenti këtu, renditja e operatorëve konkurues dhe pikëzimi i tyre është firmosur nga titullari i Institucionit Kontraktues, ministri i Shëndetësisë, Ilir Beqja.
Faktet
Komisioni i Vlerësimit të Ofertave, që monitorohej nga Beqja ka shpallur konsorciumin e përbërë nga Investital Llc, Servizi Italia S.p.a, U.Jet S.r.l dhe Tecnosanimed të parët me 73.89 pikë dhe në vendin e dytë konsorciumin e përbërë nga “Action Laundry,” S.S.I”, “Mario Gugliemo” dhe “Brema Ambiente” me 42.83 pikë. Më 8 qershor 2015, bashkimi i operatorëve i udhëhequr nga kompania e “Action Laundry” e renditur e dyta paraqiti një ankesë në KPP duke kundërshtuar renditjen e operatoreve në procedurën e koncesionit si dhe kualifikimin e konsorciumit tjetër, të përfaqësuar nga “Servizi Italia S.p.a”. Me datë 22 qershor 2015, KPP-ja pranon pjesërisht ankesën e “Action Laundry” dhe i kërkon Ministrisë së Shëndetësisë të rivlerësojë ofertat, pasi vëren se mbledhja e pikëve në vlerësimin e parë ka gabime matematikore. Pas këtij vendimi detyrues, procedura e mbledhjes së pikëve është mbajtur në datën 28 shtator 2015, dhe pikërisht në atë ditë është shpallur fituesi ku sërish ka qenë bashkimi i operatorëve “Servizi Italia”. Por çuditërisht, këtë herë kjo kompani ka marrë më shumë pikë se në vlerësimin e parë. Nga 73.98 pikë që kishte në vlerësimin e parë, tani ishte vlerësuar me 91.03 pikë. Pra me një diferencë prej 22 pikësh më tepër. Në anën tjetër, bashkimi i operatorëve që përfaqësohej nga “Action Laundry” ka marrë 45 pikë, nga 42.83 që kishte marrë në rivlerësimin e parë. Pas shpalljes së vendimit të KPP-së me datë 10 korrik, kompanitë Investital Llc, Servizi Italia S.p.a, U.Jet S.r.l dhe Tecnosanimed, kanë regjistruar një kompani të re për të operuar me koncesionin, të quajtur “Sani Service” Sh.p.k. Edhe pse me shumë pak eksperiencë se partnerët e tjerë italianë, kompania e Rrapajt, Investital Llc merr 40 % të aksioneve të kompanisë së re SaniService Sh.p.k, Servizi Italia S.p.a 30 %, Tecnosanimed 15 % dhe U.Jet S.r.l 15 %. Investimi i Rrapajt nëpërmjet e “Investital Llc” për të kontrolluar 40 % të kompanisë me koncesionin 100 milionë dollarësh, ishte vetëm 8 mijë euro. Pas shpalljes fitues të grupit të kompanive të udhëhequr nga Ilir Rrapaj, dhe themelimit të kompanisë konçesionare “Sani Service”, është sërish ministri i Shëndetësisë, Ilir Beqja që ka firmosur kontratën konçesionare 10-vjeçare. Ilir Beqja ka firmosur për llogari të Autoritetit Kontraktual Ministrinë e Shëndetësisë. Ndërsa për kompanisë koncesionare ka firmosur, administratori i “Sani Service”, Admir Daca
Në rrezik edhe Manastirliu
Ish-ministri Beqaj mund t’i bëjë dëm të madh edhe Ogerta Manastirliut. Pak javë më parë ai tha se i kërkoi prokurorëve të SPAK hetimin për sterilizmin, jo vetëm gjatë kohës kur në pushtet ishte Partia Demokratike, por dhe më vonë, pasi ai u largua si ministër dhe u zëvendësua nga Ogerta Manastirliu. “Besoj se hetimet janë ende shumë të ngushta është e domosdoshme që ato të shtrihen në dy pjesë. Së pari nga marsi 2011 deri në shtator 2013 për të hetuar pse dy vjet e gjysmë u mbaj ai central dhe nuk u vu në punë, por edhe tashmë janë bërë 8 vjet nga zbatimi i kontratës për të hetuar kush janë përfitimet e drejtpërdrejta të qytetarëve dhe buxhetit nga zbatimi i kësaj kontrate” u shpreh ish-ministri ndërsa doli nga SPAK. Mesazhi i Beqajt është i qartë: dy duar për një kokë. Ndaj për të mos patur fatin e shokëve të tjerë të partisë që sot dergjen burgjeve, apo janë arratisur jashtë vendit, Ilir Beqaj ka vendosur të luajë në kundërsulm dhe të kërkojë hetimin se çfarë ndodhi me sterilizimin, edhe pasi ai u largua si Ministër i Shëndetësisë, pra në qeverinë “Rama 2”. Beqaj është larguar si Ministër i Shëndetësisë në vitin 2017 dhe u zëvendësua atëherë nga Ogerta Manastirliu. Pretendimet e tij synojnë hetimin e ndryshimit të kontratës nga Ogerta Manastirliu në Janar të vitit 2020, kur është shtuar numri i seteve kirurgjikale të parashikuar në kontratë, që ishin 63 mijë copë për një vit. Asokohe Ogerta Manastirliu e justifikoi ndryshimin e kontratës me nevojën për sete të tjera mbi 63 mijë që do merreshin me 25% ulje, pasi operacionet në një vit shkonin deri në 90 mijë. “Do të kemi një amendim i cili do të sjellë një reduktim me 25% të çmimit për të gjithë paketat instrumentare të kompleksiteteve të ndryshme, mbi një numër referencial prej 64 mijë ndërhyrjesh”, deklaroi Manastirliu në Janar të vitit 2020. Kërkesa e Ilir Beqajt në SPAK ka të bëjë pikërisht me këtë ndërhyrje në kontratë, që sipas ka ndikuar në shtimin e kostove në buxhetin e shtetit dhe për të cilat ai nuk pranon të mbajë fajësinë. Me kërkesën për zgjerimin e hetimeve, Beqaj refuzon të shkojë drejt burgut siç bënë socialistët e tjerë ndaj kërkesa për SPAK është hetimi i qeverisë “Rama 2”. Ogerta Manastirliu qëndroi në drejtim të Ministrisë së Shëndetësisë për 6 vjet dhe u larguar në shtator të vitit 2023 kur u emërua ministre e Arsimit. Ajo është një nga bashkëpunëtoret më të hershme të Edi Ramës që nga koha kur ky mori drejtimin e Bashkisë së Tiranës. Nëse Manastirliu do të merrej nën hetim, ashtu siç ka kërkuar Ilir Beqaj, ajo do të ishte ministrja e parë në detyrë që hetohej nga Prokuroria Speciale.
