Qeveria kanadeze ka pezulluar për një kohë të pacaktuar eksportet e armëve në Izrael, sipas Zyrës së Ministrit të Punëve të Jashtme.
“Kanadaja ka një nga regjimet më rigoroze të lejeve të eksportit në botë”, thuhet në një deklaratë nga zyra. “Nuk ka leje të hapura për eksportet e mallrave vdekjeprurëse në Izrael”.
“Lejet e eksportit të miratuara nga data 7 tetor deri më 8 janar janë ndarë me komisionin parlamentar që studion këtë çështje. Që nga 8 janari, qeveria nuk ka miratuar leje të reja të eksportit të armëve në Izrael dhe kjo do të vazhdojë derisa të sigurojmë pajtueshmëri të plotë me regjimin tonë të eksportit”, vazhdoi deklarata.
Lejet e eksportit të miratuara para datës 8 janar janë ende në fuqi, sipas Zyrës së Ministrit të Punëve të Jashtme. Ndërkohë Kanadaja kishte ndalur eksportet e pajisjeve dhe teknologjisë ushtarake jo-vdekjeprurëse në Izrael në janar duke pasur parasysh rrezikun e shkeljeve të të drejtave të njeriut.
