Dy komisionet hetimore, ai për koncesionet në Shëndetësi dhe për sistemin TIMS, do të mblidhen ditën e nesërme në Kryesinë e Kuvendit.
Komisioni hetimor për rrjedhjen e të dhënave nga sistemi TIMS do të konstituohet ditën e nesërme. Ky komision do drejtohet nga deputeti demokrat Ervin Salinaji, ndërsa mazhoranca ia ka besuar ‘mbrojtjen’ Toni Gogut. Në rendin e ditës është përcaktuar zgjedhje e sekretarit të Komisionit, si edhe deklarimi i planit paraprak të hetimit.
Po nesër, zhvillohet edhe mbledhja e dytë e komisionit hetimor në Shëndetësi, për dy koncesionet e sterilizimit dhe check up. Në këtë mbledhje pritet të caktohen ekspertët dhe institucionet që do t’i drejtohen për informacion. Rithemelimi ka thirrur rreth 16 dëshmitarë, mes të cilëve kryeministri Rama e ish ministrat e shëndetësisë Beqja e Manastirliu.
Këto dy komisione u ngritën, pas paktit PS-Rithemelimi për kthimin e normalitetin në Kuvend.
