Kreu i Partisë Demokratike, Lulzim Basha ka prezantuar amendamentet për mbështetjen financiare për SPAK dhe Byronë Kombëtare të Hetimit.
Një ndër amendamentet që pritet të propozojë Lulzim Basha është dhe kërkesa e kreut të PAK, Altin Dumani për t’u dhënë mundësi prokurorëve të Posaçëm që pas përfundimit të mandatit 9 vjeçar në detyrë, t’u jepet mundësia të rikandidojnë për një mandat të ri në këtë Strukturë të Posaçme Anti-Korrupsion.
Sipas ligjit aktual, prokurorëve të SPAK nuk i jepet mundësia e rikandidimit, por pas përfundimit të 9 viteve, ata duhet të rikthehen në prokuroritë ku kanë ushtruar funksionet e mëparshme.
Lulzim Basha: PD do të kërkojë procedimin me shpejtësi të këtyre propozimeve dhe votimin e tyre në Kuvendin e Shqipërisë.
I pari ka të bëjë me amendamentet përkatëse në buxhetin e shtetit për dhënien e mbështetjes së plotë financiare për burimet e nevojshme njerëzore dhe të tjera të kërkuara nga SPAK dhe BKH.
Do të kërkojmë fonde të mjaftueshme për të rritur me 50% numrin e hetuesve BKH, bashkë me fondin e pagave për ta, por edhe rritjen e mbështetjes logjistike qoftë për hetuesit aktualë, qoftë për ata që do ti bashkangjiten kësaj strukture për të përballuar volumin e jashtëzakonshëm të çështjeve që vetëm shtohen si rezultat i korrupsionit qeveritar. Rritjen me 50% të numrit të këshilltarëve ligjorë për SPAK.
Janë asistentët juridikë të Prokurorëve të SPAK që po kështu me numrat aktualë janë të mbingarkuar për shkak të korrupsionit të kudogjendur dhe vendosmërisë së tyre për të mos mbyllur sytë por për të hetuar korrupsion dhe vendosjen e përgjegjësve para ligjit.
