Punonjës të profesioneve të ndryshme po protestojnë këtë 1 Maj përpara Kryeministrisë. Në pankartat e tyre lexohen mesazhe të ndryshme që kanë në thelb trajtimin me dinjitet për punëtorët.
“Oficerët kanë status, të gjithë kanë status, jemi në kushtet më të vështira. Jemi të diskriminuar, të sëmurë, asnjë nuk merr parasysh kërkesat tona. I kemi dhënë ekonomisë shumë të ardhura, sot jemi të persekutuar”, tha një minator.
Një përfaqësuese e sindikatës së arsimit tha se duhet të dyfishohet paga dhe t’i kthehet vëmendja shkollave. Ajo deklaroi se ministret e kanë kthyer shkollën në shkollë Facebook-u, ku imponohet mësuesve të bëjnë like e share e jo punën e tyre.
“Sot jemi përpara Kryeministrisë për të kërkuar dyfishimin e pagës së mësuesit. Gjithashtu kemi nevojë që Kryeministri të kuptoj që shkollat kanë nevojë për investime. Ministret e kanë kthyer shkollën në shkollë Facebook-u, ku imponohet mësuesve të bëjnë like e share e jo punën e tyre. Ti kthehet vëmendja shkollës”, tha ajo.
