Drejtoria Vendore e Policisë Durrës, me rastin e 25-vjetorit të rënies në krye të detyrës të ish-punonjësit të Policisë, Margarit Konakçiu, ka zhvilluar një ceremoni përkujtimore, për të kujtuar dhe nderuar veprën dhe sakrificën sublime të ish-efektivit.
Të pranishëm në ceremoninë e zhvilluar në varrezat ku prehet ish-efektivi i Policisë, ishin shefi i Komisariatit të Policisë Kavajë Gazmend Demrozi, shefi i Personelit të DVP Durrës Zija Sulaj, përfaqësues nga Bashkia Kavajë, familjarë të tij dhe punonjës policie të Komisariatit të Policisë Kavajë, të cilët vendosën kurora me lule, për të vlerësuar sakrificën e tij.
Akti sublim i ish-efektivit Margarit Konakçiu si dhe i Dëshmorëve të tjerë të Policisë së Shtetit, të rënë ndër vite, përbën një motiv më shumë për çdo punonjës të Policisë së Shtetit, për të vijuar me vendosmëri punën dhe përpjekjet, për garantimin e rendit dhe sigurisë, në shërbim të komunitetit.
