Abdixhiku në një përgjigje me shkrim i ka thënë Kurtit se LDK ashtu si deri më tani, do të vazhdojë t’i votojë marrëveshjet ndërkombëtare, derisa për agjendën tjetër legjislative përgjigjet i jep përfaqësuesi i LDK-së në Kryesi të Kuvendit.
Megjithatë, Abdixhiku thotë se Kurti është i vonuar ne ftesën e tij për bashkëpunim me opozitën pasi sipas Abdixhikut ai deri më tani “ ka mbjellë polarizim të skajshëm dhe ofendues ndaj të gjitha partive tjera politike në Kosovë”, ka deklaruar mes tjerash Abdixhiku.
Kryeministri i Kosovës, Albin Kurti i ka ftuar për të hënën në një darkë pune liderët e tri partive parlamentare opozitare, Partisë Demokratike të Kosovës, Lidhjes Demokratike të Kosovës dhe Aleancës për Ardhmërinë e Kosovës për të diskutuar rreth përmbushjes së agjendës legjislative për sezonin pranveror.
Kurti në letrën të cilën ua ka dërguar tri partive opozitare thekson se arsyeja pse ka takuar krerët e partive dhe shefat e grupeve parlamentare ka të bëjë me atë që të diskutohen hapat për përmbushjen e agjendës legjislative.
Partia Demokratike e Kosovës e ka pranuar ftesën e kryeministrit Albin Kurti për një takim pune, për të hënën. Zëdhënësi i PDK-së, Faton Abdullahu, duke e konfirmuar pranimin e ftesës, ka bërë të ditur se kryetari i PDK-së, Memli Krasniqi do të marrë pjesë në këtë takim.
“Qëndrimi ynë si PDK është i qartë dhe konsistent – Kosova është në krizë në çdo fushë dhe rrugëdalje e vetme janë zgjedhjet e parakohshme parlamentare, të cilat duhet të mbahen sa më parë.
Prandaj edhe pjesëmarrja e Kryetarit Krasniqi në këtë takim do të jenë në funksion të diskutimit për mundësinë e caktimit të datës për zgjedhje të reja”, ka theksuar për televizionin publik, Faton Abdullahu, zëdhënës i PDK-së.
Aleanca për Ardhmërinë e Kosovës është duke shqyrtuar ftesën e bërë nga kryeministri Albin Kurti për një takim më 13 maj.
“Jemi në shqyrtim të pjesëmarrjes”, ka thënë për median zëdhënsi i AAK-së, Lulezim Blaka.
Deri më tani është PDK që ka pranuar ftesën, derisa nga LDK kanë refuzuar që t’i shkojnë Kurtit në darkën e së hënës.
Në ftesën e Kurtit është thënë se në këtë takim do të diskutohet rreth përmbushjes së agjendës legjislative për sezonin pranveror.
