Sipas Al Monitor, më shumë se 70 anëtarë të Kongresit amerikan nënshkruan një letër drejtuar Sekretarit të Shtetit , Anthony Blinken, duke i bërë thirrje Departamentit të Shtetit që t’i bëjë presion Turqisë për drejtësi dhe përgjegjësi për sulmin e vitit 2017 nga truprojat e presidentit turk Rexhep Tajip Erdogan në Uashington.
Sulmi plagosi shumë protestues, disa rëndë, jashtë rezidencës së ambasadorit turk në Sheridan Circle, në një incident që ka njollosur imazhin e Ankarasë në Shtetet e Bashkuara dhe ka demonstruar tolerancën e regjimit turk për veprime të tilla autoritare. Letra, e cila u nda ekskluzivisht me Al-Monitor, do të dërgohej sot.
70 kongresmenët amerikanë vënë në dukje se Turqia u përpoq të anashkalonte ndjekjet e ngritura pas ankesave nga kurdët Murat Yasa dhe Lusik Usoyan, duke argumentuar se truprojat e Erdogan kanë imunitet diplomatik.
Ankesa e Turqisë u refuzua pasi u shqyrtua nga Gjykata e Apelit në Kolumbia dhe refuzimi u la në fuqi nga Gjykata e Lartë e cila pranoi qëndrimet e administratës Biden.
Që atëherë, Turqia ka injoruar procesin në gjykatat amerikane në një përpjekje për të shmangur një gjyq, gjë që ka zemëruar 70 anëtarët e Kongresit si nga demokratët ashtu edhe nga republikanët.
Letra është nënshkruar nga figura të shquara politike, duke përfshirë demokratin Steny Hoyer nga Maryland, dy herë udhëheqës i shumicës në Dhomë dhe 10 anëtarë të Komisionit të Marrëdhënieve të Jashtme të Dhomës së Përfaqësuesve.
Të 70-të kujtojnë gjithashtu se Kongresi kishte miratuar njëzëri një rezolutë menjëherë pas sulmeve dhe bëri “deklaratën e qartë se akte të tilla të kryera nga aktorë të huaj në tokën amerikane kundër amerikanëve nuk mund dhe nuk do të tolerohen pa pasoja”.
