Vitin e ardhshëm Kukësi do të jetë pjesë e Kategorisë së Parë, duke qenë larg elitës pas më shumë se një dekadë pjesë e saj. Mirëpo, sezonin e dobët në kampionat mund ta sfumonte disi Kupa e Shqipërisë, duke shkuar deri në finale, aty ku u mposht nga Egnatia.
Edhe pse ndoshta me disnivel sa i përket kualiteteve, blutë e Devollit treguan se me pak fat mund të ishin ata fitues. Një ditë pas ndeshjes, në kampin blu kanë ende pretendime për dy momente vendimtare të sfidës që nuk u vendosën në favor të tyre. Edhe pse tanimë asgjë nuk kthehet mbrapsht, në njëfarë mënyre ata ndihen të vjedhur, pasi bëhet fjalë për dy pretendime për penallti.
RASTET – Sipas zyrtarëve verilindorë, për “Panorama Sport” ata kanë evidentuar këto momente, ku më i pastri është ai i minutës së 74-t, ku Dulis prek topin me dorë, por gjyqtari vazhdon lojën dhe nga VAR nuk ka ndërhyrje për ta riparë. Ndonëse në pamjet e dhëna duket si pretendim i tepërt, nëpërmjet një fotoje, klubi kuksian pretendon të kundërtën, me topin që e ka prekur mjaftueshëm dorën.
Rasti tjetër është ai i minutës së 50-të, aty ku Montenegro në tentativë për të larguar topin nga zona, ka dyshime se e ka prekur edhe me dorë, por që gjatë ndeshjes askush nuk e vuri re dhe u kalua.Dy momente që në kampin blu i konsiderojnë si vendimtare,duke qenë se ndeshja në fund fare u vendos vetëm nga një gol dhe fatet e saj mund të kishin ndryshuar, me Kukësin që do të shpresonte deri në fund ta mbyllte me një trofe këtë vit.
GJYKIMI – Përpos mëkateve të veta të këtij sezoni, Kukësi një pjesë të zhgënjimit këtë vit ia ka faturuar edhe gjykimit. Kanë qenë shumë ndeshje këtë edicion që janë ankuar ndaj tyre, madje edhe duke shpallur disa arbitra, madje edhe delegatë, “non grata”. Fakti që në Kupë, rastet e diskutueshme nuk i patën në favor, në njëfarë mënyre tregon sezonin e vështirë që klubi pati me gjykimin.
