Sipas prokurorisë, Alma Arrazi ka ndërmarrë aktin ekstrem së bashku me fëmijët për shkak të dhunës së vazhdueshme psikologjike, shfaqur në formën e ofendimeve të vazhdueshme dhe tradhtisë bashkëshortore nga ana e partnerit të saj Ergys Arrazi, duke prekur rëndë dinjitetin e saj.
“E rëndësishme është që grupi hetimor të përcaktojë saktësisht ushtrimin e dhunës në familje dhe shkaktimit të vetëvrasjes nga ana e autorit karshi bashkëshortes së tij dhe për pasojë edhe karshi fëmijëve të tij. Në pikëpamje të përcaktimit të veprës duhet të kemi në konsideratë një fakt shkaktimi vrasjes është ndaj bashkëshortores ndërsa vdekja e tre fëmijëve është në varësi të vendimit ?që do të përcaktohet nga vrasje që i ka bërë nëna 3 fëmijëve dhe pastaj ka vrarë veten apo në një formë tjetër e kryerjes së dinamikës së hetimit”, u shpreh ish-prokuror Eugen Beçi.
A mund të kryente një mendje normale njerëzore një akt të tillë ndaj 3 fëmijëve të vetë? Në argumentat e mbrojtjes së bashkëshortit të saj Erdgys Arrazi, janë vënë në pah problemet e mundshme të Almës me depresionin. Sipas pretendimeve ajo kurohej me antidepresivë të fortë për probleme me depresionin, dëshmitë që janë hedhur poshtë nga të afërmit e Almës së ndjerë. Ndërkohë, mjeku psikiatër është shprehur se para dy viteve ajo është trajtuar për probleme të ankthit, por nuk ka pasur probleme të shëndetit mendor. Kjo është receta me medikamentet që i është lëshuar Alma Arrazit.
“Prania e simptomave të ankthit apo humorit të rënë të raportuara nga mjeku psikiatër në Shkodër sigurisht që mund të kurohej pa patur nevojë për shtrim në spital pra në kushtet ambulatore”, u shpreh mjeku psikiatër, Neli Demi.
Dinamika e kësaj ngjarje ndryshon nga momenti në moment. Organet kompetente do të rimarrin në pyetje kunatën e Alma Arrazit që ishte dhe personi i fundit që e ka takuar, të paktën sipas pamjeve të siguruar nga kamerat e sigurisë.
“Për shkak të dyshimeve se kunata dhe e dashura e Ergys Arrazit nuk kanë qenë të sinqerta gjatë dhënies së dëshmisë gjatë veprimeve paraprake grupi hetimit ka vendosur që të ripyesë të dyja gratë ditën e martë”, u shpreh gazetarja Anila Hoxha
Në pyetje do të merret edhe e dashura e Ergys Arrazit. Sipas burimeve konfidenciale për Inside Story vajza 17-vjeçare ka pasur një tronditje të madhe nga kjo ngjarje.
“Do të merret në pyetje edhe e dashura e Ergys Arrazit sepse hetuesit kërkojnë të sqarojnë disa dilema në lidhje me nëse ka patur ose jo kërcënime dhe nëse bashkëshorti Ergysi i ka rrëfyer asaj mbi marrëdhënien me bashkëshorten me Almën dhe në lidhje me çfarëdolloj veprimi tjetër që ai kishte përllogaritur për të ndërmarrë”, u shpreh gazetarja Anila Hoxha.
Ergys Arrazi nuk është marrë ende në pyetje. Ai mbahet në burgun e Reçit me statusin e të paraburgosurit. Sipas autoriteteve, gjendja e tij psikologjike është e rënduar. Për këtë arsye dhe nga frika e ndonjë reagimi që mund të vijë nga të paraburgosurit e tjerë, Ergys Arrazi është në izolim. Ai nuk ka takuar asnjë nga familjarët e tij. Megjithatë Ergys Arrazi nuk është një emër i panjohur për kartelat e drejtësisë shqiptare. Ai në mars të 2022 është ndaluar për kultivim dhe tregtim të lëndëve narkotike. Por për mungesë provash u la i lirë në dhjetor të 2022. Gjatë kësaj kohe ai kishte zhvilluar biseda dhe takime me familjen e tij dhe me Alma Arrazin.
“Në kartelat e shkruara dhe të poseduara në burgun e Reccit përshkruhet edhe dinamika e këtij personi që i nënshtrohet një trajtimi individual sa i përket aftësisë sociale gjithashtu edhe të mënyrës së të menduarit shkruhet në kartelën vetjake. Tregohet si një person që kishte komunikuar në skajp me familjen e tij para edhe me Almën edhe me fëmijët e tij dhe takimet fizike që kishte mbajtur. Ndërkohë që e tregonte dhe e shfaqte marrëdhënien me bashkëshorten e tij në 2022 si të qëndrueshme dhe pa probleme”, u shpreh gazetarja Anila Hoxha
Një fakt tjetër që të kujton filmat me detektivë është edhe hetimi paralel që po zhvillohet. Familja e Ergys Arrazit ka filluar hetimin e vetë për ngjarjen duke kërkuar kamerat e sigurisë në bizneset e zonës.
“Një hetim i dytë paralel po bëhet edhe nga familjarët e Ergys Arrazit të cilët në disa biznese janë paraqitur me kërkesën për të kqyrur edhe ata pamjet e kamerave. Në rastin e parë të krijon bindjen se ata po mbledhin prova për të liruar Ergys Arrazin dhe në rastin tjetër të lë të mendosh që edhe ata vetë të kenë bindjen e qartë mbi këtë ngjarje tepër të rëndë në Shqipëri”, u shpreh gazetarja Anila Hoxha.
