Shkalla e rritjes së dyoksidit të karbonit atmosferik është aktualisht 10 herë më e shpejtë se në çdo kohë në 50 000 vitet e fundit, sipas një ekip studiuesish të udhëhequr nga Universiteti Shtetëror i Oregonit.
Gjetjet ofrojnë kuptim të rëndësishëm të periudhave të ndryshimeve të papritura klimatike në të kaluarën e Tokës dhe ofrojnë njohuri mbi ndikimet e mundshme të ndryshimit të klimës.
Shkalla e rritjes së dyoksidit të karbonit (CO2) është përshkruar si “e paprecedentë” dhe e nxitur nga emetimet njerëzore.
Kur gazi hyn në atmosferë kontribuon në ngrohjen e klimës për shkak të efektit serë.
Në të kaluarën, nivelet kanë luhatur për shkak të cikleve të epokës së akullit dhe shkaqeve të tjera natyrore, por sot, thonë shkencëtarët, ato po rriten për shkak të emetimeve njerëzore.
”Studimi i së kaluarës na mëson se sa e ndryshme është sot. Shkalla e ndryshimit të CO2 sot është vërtet e paprecedentë. Kërkimi ynë ka identifikuar ritmet më të shpejta të rritjes natyrore të CO2 të vërejtur ndonjëherë në të kaluarën, dhe shkalla që ndodh sot, kryesisht e nxitur nga emetimet njerëzore, është 10 herë më e lartë”, theksoi Kathleen Wendt, asistentprofesore në Kolegjin e Shkencave të Tokës.
Akulli që është grumbulluar në Antarktik gjatë qindra mijëra viteve përfshin gazra të lashtë atmosferikë të bllokuar në flluska ajri.
