Ish-kryeministri Sali Berisha ka reaguar pas deklaratës së zëvendësndihmëssekretarit amerikan Gabriel Eskobar i cili tha se shpreson që në krye të PD-së mos vihet dikush që u kujton kohët e këqija.
Përmes një postimi në Facebook Berisha shkruan se qytetarët opozitarë e kanë treguar se kush është përfaqësuesi i tyre legjitim.
“Reagim ndaj deklaratës së Zotit Gabriel Eskobar.
Në një intervistë të tij, dhënë gazetares Ilva Tare, Zëvendës Ndihmës Sekretari i Shtetit z. Gabriel Eskobar ndër të tjera ka deklaruar: “Dhe më duhet të them, shpresoj që zgjedhja për drejtimin të mos jetë dikush që na kujton ditët e këqija e të vjetra në Shqipërinë e viteve ’90. Kështu që unë shpresoj se përfundimisht partia kryesore opozitare do ta gjejë rrugën e saj”.
Sa për kujtesë vitet ‘90 kanë qenë vitet e zgjimit dhe daljes nga diktatura. Vitet kur Partia Demokratike udhëhoqi revolucionin demokratik të përmbysjes së diktaturës më të egër të Hitlerit shqiptar të pas luftës, Enver Hoxhës dhe kalimin e vendit nga monizmi në demokraci. Në atë kohë James Baker do u thonte shqiptarëve: “Ju keni të drejtë të zgjidhni liderët tuaj”!