Gjendja e kryeministrit të Sllovakisë Robert Fico, pas një atentati në fillim të këtij muaji, është duke u përmirësuar, thanë të hënën burime qeveritare dhe spitalore.
Fico u qëllua katër here teksa përshëndeti mbështetësit në një tubim qeveritar në qytetin qendror të Sllovakisë, Hadlova, më 15 maj.
59-vjeçari Fico u qëllua në bark dhe u dërgua në spital në gjendje të rëndë. Ai iu nënshtrua menjëherë një operacioni që zgjati më shumë se pesë orë dhe një tjetër ndërhyrje dy ditë më vonë.
Gjendja e tij që atëherë është përmirësuar, tha Spitali Universitar FD Roosevelt në një përditësim të përditshëm.
“Në bazë të rezultateve të analizave, mbledhja e sotme e bordit mjekësor konfirmoi përmirësimin gradual të gjendjes shëndetësore të kryeministrit”, tha qeveria pa dhënë detaje të tjera.
Sulmi, përpjekja e parë e madhe për vrasjen e një lideri politik europian në më shumë se 20 vjet, nënvizoi polarizimin e thellë politik në shoqërinë sllovake.
Policia arrestoi në vend autorin e sulmit. Prokurorët e akuzuan më vonë për vrasje me paramendim dhe një gjykatë urdhëroi paraburgimin e tij.
71-vjeçari i tha gjykatës se donte të lëndonte, jo të vriste, kryeministrin e Sllovakisë, sepse ai nuk ishte dakord me politikën e qeverisë dhe përdori një armë që e kishte në pronësi për më shumë se 30 vjet.
