Përse jam kundër rezolutës anti-korrupsion të PS-së?

Së pari, unë dua të qartësoj një qëndrim të Partisë Agrare Ambientaliste, që lidhet me filozofinë e saj politike, si parti e qendrës. Edhe pse në opozitë, ne nuk jemi kundër bashkëpunimit me mazhorancën për interesa të popullit dhe kombit, dhe nuk do të kemi asnjë kompleks politik ta bëjmë këtë.

Tani, sa i takon draft-rezolutës që vjen sot për miratim, e titulluar “Për thellimin e reformave për mirëqeverisjen, sundimin e ligjit dhe anti-korrupsionin për Shqipërinë 2030 në Bashkimin Europian”. Kur e lexon, si titull të duket mjaft joshës për ta mbështetur. Por çfarë është kjo në vetvete? Çfarë ka brenda kjo rezolutë? Nuk e dimë ende.

Opozitës po i kërkohet tani, që të bëjmë një rezolutë për të ngritur një strukturë parlamentare për ta qeverisur më mirë Shqipërinë. Edhe pse detyra e qeverisjes dhe mirëqeverisjes është e mazhoracës, sërish kjo duket ftesë shumë mirë. Populli atje jashtë mund të thotë: Po të bashkëpunojnë për të mirën tonë, përse të mos bashkëpunojnë, për atë punë i kemi votuar. Dhe populli ka të drejtë. Por, ndërsa neve na kërkohet sot të bashkëpunojmë për ta mirëqeverisur Shqipërinë, si shpjegohet që kjo mazhorancë në 10 vjet nuk kishte vullnetin dhe kurajën politike të merrte ne konsideratë qoftë edhe një propozim të vetëm të opozitës, për ta qeverisur këtë vend e këtë popull më mirë?

Unë personalisht kam prezantuar këtu një projektligj për disa ndryshime në ligjin për mbështetjen e fermerëve, për t’i ndihmuar ata që prodhimet e tyre të mos i çojnë dëm nëpër përrenj e kanale kur nuk i shensin, po ta shndërrojnë djersën e tyre në para. As denjuat ta dëgjonit e jo më ta konsideronit. Ju duhet ta dini se fermeri nuk mbështet duke bërë foto nëpër sera e fusha me domate dhe shalqinj, per t’i hedhur në fejsbuk.

Por, përtej kësaj, kam një pyetje: Si do të mirëqeverisim ne duke bashkëpunuar? Na tregoni çfarë doni të bëni dhe nëse ato që doni të bëni janë në dobi të popullit dhe vendit, ne sërish ju mbështesim. Por, për çfarë mund t’ju mbështesim kur as ju nuk e dini çfarë doni të bëni konkretisht. Ose ju mund ta dini, por nuk e keni deklaruar publikisht.

Ju na ftoni të bëjmë një strukturë parlamentare për të luftuar korrupsionin sëbashku. Edhe kjo është shumë e bukur dhe e dobishme. Por çfarë mund të bëjmë ne për të luftuar korrupsionin? Ne mund të denoncojmë dhe opozita është duke e bërë këtë shumë mirë. Ne mund të votojmë ligje që mund t’i shërbëjnë luftës kundër korrupsionit. Na i sillni dhe ne i votojmë, nëse janë vërtet të dobishme.

Kryeprokurori i SPAK-ut tha pak ditë më parë në Kuvend se korrupsoni bëhet me tenderat dhe kontratat publike që i fitojnë kompanitë offshore. Ne e dimë se si këto kompani fitojnë tendera, marrin koncensione e PPP-ra, e më pas zhdukin gjurmët duke ia shitur apo dhuruar kontratat dhe bizneset njëra-tjerës. Njëra në Holandë, tjetra në Singapor, njëra në Malajzi e tjetra në ishujt Virxhin. Edhe pse janë të regjistruara në ishujt e parajsave fiskale, ne e dimë se i kanë zyrat në mes të Tiranës. Na sillni një projektligj që të ndalohet dhënia e tenderave, koncensioneve dhe PPP-ve këtyre kompanive të maskuara, dhe ne e votojmë.

Prokurori tha se paratë pastrohen në sektorin e ndërtimit. Na sillni një projektligj apo një vendim që të forcojë kriteret për verifikimin e burimit të financave për kullat e gradaçelat, dhe ne e votojmë.

Prokuroria tha se nuk ka asnjë denoncim nga strukturat qeveritare. Keni një ministri anti-korrupsion, keni departamente kontrolli e monitorimi të kontratave dhe koncensioneve në çdo ministri. Kontrolloni e denonconi ata që abuzojnë me buxhetet, ç’ju duhemi ne?

Ju po i dhuroni tokat në bregdet njëri-tjetrit dhe bandave të krimit për investime strategjike. Hajde ta shfuqizojmë ligjin e investimeve strategjike, dhe ne e votojmë.

Ju na ftoni të luftojmë korrupsionin, por edhe nja dy komisione hetimore parlamentare që janë ngritur për dy çështje, ju po i sabotoni.

Ju paralajmëroni të mbështesni përmes kësaj strukture parlamentare prokurorinë. Por për çfarë dhe me çfarë? Kryeprokurori i SPAK-ut kërkoi shtimin e numrit të prokurorëve sepse ka volum të madh pune. Hajde t’ia shtojmë. Ai kërkoi siguri për prokurorët e gjykatësit pasi t’u mbarojë mandati. Hajdeni t’ua sigurojmë, sepse edhe ata janë njerëz, nuk mund të ndeshen sot me krimin e korrupsionin e nesër t’i nxjerrim në rrugë. Ne e japim votën tonë, edhe për këto, pa qenë nevoja për struktura të posaçme parlamentare.

Ju nuk keni sqaruar asgjë se çfarë do të bëjë kjo strukturë. Por keni përcaktuar vitin 2030 që është një objektivi juaji politik për të qëndruar në qeveri dhe ne duhet të japim ndihmën tonë që ju ta përmbushni këtë objektiv.

Të nderuar kolegë të mazhorancës. Nëse ky vend do të ishte në rrugën e zhvillimin dhe sundimit të ligjit, unë u them me sinqeritet, do e jepja votën time jo këtu, por edhe nesër në zgjedhje si qytetar. Sepse para se të jem politikan unë jam qytetar i këtij vendi, jam prind, janë sipërmarrës dhe dua të shikoj më të mirën për vendin tim dhe familjen time.

Por në kushtet kur ju krenoheni me numrin e madh të zyrtarëve të lartë të arrestuarve për korrupsion, duke e cilësuar këtë si sukses tuajin dhe jo përgjegjësi, unë nuk mund të bashkohem.

Ju do të shkoni në zgjedhjet e 2025-ës duke tundur si flamur numrin e zyrtarëve të arrestuar për korrupsion, duke thënë: Ky është suksesi ynë! Në fakt ky është dështimi juaj, sepse ata janë qeveria juaj që kanë vjedhur taksat e qytetarëve. Ju po kërkoni që të merrni opozitën me vete përmes kësaj strukture, që të ndani përgjegjësinë e korrupsionit, por edhe të bëni ndonjë prapësi konsensuale ndaj SPAK-ut, sikurse hamendësohet.

Unë nuk mund të jem pro kësaj nisme. Jam në një moshë të atillë sa më duhet ta kem ndërgjegjen të qetë edhe sikur të di që kjo është hera e fundit që flas në këtë kuvend.

Një fjalë të fundit!

Ne nuk të do jemi të përjetshëm në këto karrige.

Nuk do të rrimë këtu deisa të vdesim.

Por ajo që ne bëjmë këtu, si për mirë ashtu dhe për keq, do të jetojë gjatë në kujtesën e popullit, pasi do të ketë efekt të gjatë në jetën e tij.

Ndaj unë ju ftoj që t’i lini këto akrrobaci, bëni ndryshimet në Kodin Zgjedhor, të bëjmë zgjedhje të lira dhe të drejta, t’i lëmë njerëzit të votojnë të lirë dhe të qetë dhe kush ta meritojë, të hipë apo të qëndrojë në pushtet.