Një raketë kineze Tianlong-3 u rrëzua të dielën pas një lëshimi aksidental gjatë një testi tokësor, tha kompania e saj Space Pioneer në një deklaratë.
Space Pioneer, një kompani lider në sferën komerciale të raketave, është e specializuar në raketat me lëndë djegëse të lëngshme.
Sipas CNN, incidenti ndodhi kur faza e parë e raketës Tianlong-3 u shkëput nga platforma e saj e lëshimit për shkak të një dështimi strukturor. Raketa ra në një zonë kodrinore të qytetit Gongyi në Kinën qendrore.
Në një deklaratë, Space Pioneer shpjegoi se lidhja midis trupit të raketës dhe platformës së provës dështoi, duke bërë që raketa e fazës së parë të ndahej nga platforma e lëshimit.
Pas ngritjes, kompjuteri në bord u mbyll automatikisht dhe raketa ra në malet e thella 1.5 kilometra në jugperëndim të platformës së provës. Trupi i raketës ra në mal dhe u shpërbë.
Sipas deklaratës së kompanisë, nuk pati të lënduar pas përplasjes pasi njerëzit në zonë u evakuuan përpara testit të raketës.
Tianlong-3, raketa që u rrëzua të dielën, është një raketë e madhe bartëse të lëngshme. Ajo u krijua për të ndihmuar në ndërtimin e rrjetit satelitor të internetit të Kinës.
Aksidenti vjen vetëm disa ditë pasi moduli hënor i Kinës Chang’e-6 u kthye në Tokë nga hapësira, ku mblodhi mostrat e para ndonjëherë nga ana e errët e Hënës.
