Mario Ashiku, personazhi karizmatik i kinematografisë shqiptare ka festuar 85-vjetorin e lindjes. Miq, të afërm dhe kolegë i kanë uruar Ashikut 85-vjetorin e lindjes.
Mario Ashiku lindi në Shkodër me 29 korrik të vitit 1939. Me të mbaruar studimet në Shkollën e Lartë të Aktorëve “Aleksandër Moisiu”, emërohet aktor në Teatrin Popullor (sot Teatri Kombetar) në vitin 1963.
Pas dy viteve emërohet anetar i Këshillit Artistik të Teatrit Kombëtar e më pas fillon punë si pedagog i jashtëm në lëndën e Mjeshtërisë së Aktorit në Shkollën e Lartë “A.Moisiu”. Më pas fillon kursin pasuniversitar të regjisë drejtuar nga Kujtim Spahivogli, duke e mbaruar këtë kurs në vitin 1970 me temë diplome komedinë romantike “Ylli pa emër” (të cilën do t’a rivinte në skenë në vitin 1988 në Teatri “Aleksandër Moisiu”)
Me krijimin tashmë të Institutit të Lartë të Arteve (1966) fillon punë si pedagog i brendshëm i lëndës së Mjeshtërisë së Aktorit.
Emërohet Shef i Katedrës së Mjeshtërisë së Aktorit në vitin 1973 e pas dy viteve emërohet regjisor në Pogradec, e në vitin 1986 emërohet regjisor i Teatri “Aleksandër Moisiu” ku për tre vite rresht vë në skenë rreth 10 pjesë të ndryshme nga të cilat përmendim: “Vrragat e gjakut”, “Ylli pa emër”, “Lebra”, “Shtëpia e lepujve”, “Hija e tjetrit” etj.
Pas medaljes “Naim Frashëri” në vitin 1992 merr titullin “Artist i Merituar”.
Në vitin 1997 rikthehet pedagog në Akademinë e Arteve, Fakulteti i Artit skenik.
Me rreth 20 role ne teatër, 12 në kinematografi, mbi 20 pjesë teatrale të vëna në skenë si regjisor e rreth 30 pjesë të vëna në skenë me estradën e pogradecit, bashkëautor i shumë botimeve si; “Mjeshtëria e Aktorit”, “Ç’është Teatri”. “Ç’është aktrimi”, “Fabula, ngjarjet dhe faktet”, “Monologu i brendshëm” etj, Mario Ashiku ka mundur të ruajë një dritë brenda tij, që e bën sot të kujtojë bukur të shkuarën dhe kur gjen kohë jo të bukura në të.
