Ministria e Jashtme e Moldavisë e ka shpallur të enjten person të padëshiruar një punonjës të Ambasadës së Rusisë në Kishinjev dhe i ka dhënë 48 orë kohë për t’u larguar nga vendi.
Ky vendim vjen pak orë pasi autoritetet në Kishinjev i ndaluan dy zyrtarë moldavë pas një bastisje nga forcat e sigurisë në ndërtesën e Parlamentit, në lidhje me një hetim për spiunazh.
Ambasadori i Rusisë, Oleg Vasnetsov “u thirr sot në Ministrinë e Jashtme, ku iu dha një letër, e cila e shpall person non-grata një punonjës të Ambasadës”, tha Ministria në një komunikatë për media të enjten.
Ajo shtoi se vendimi u mor pasi autoritetet moldave siguruan “informata dhe prova” që dëshmojnë se diplomati rus kreu “veprimtari që nuk është në përputhje me statusin diplomatik në territorin e Moldavisë”.
Vendimi për ta dëbuar diplomatin rus, emri i të cilit s’u bë i ditur, erdhi pak pasi agjentët e Shërbimit të Inteligjencës dhe Sigurisë së Moldavisë dhe Zyra e Prokurorit për Luftimin e Krimit të Organizuar bastisën ndërtesën e Parlamentit të Moldavisë dhe i ndaluan një punonjës të legjislaturës dhe një zyrtar të policisë kufitare, të dyshuar për tradhti dhe konspiracion.
Ata dyshohet se mblodhën informata dhe ia dhanë një punonjësi të Ambasadës së Rusisë në Kishinjev, të cilat i dëmtojnë interesat e Moldavisë.
“Është e rëndësishme të sigurohemi tani që ky rast i tradhtisë do të ndëshkohet në mënyrën më të ashpër, bazuar në ligj”, tha presidentja properëndimore e Moldavisë, Maia Sandu, për Jurnal TV, mbrëmjen e së mërkurës.
