Nga Skënder Kapiti
Nacionalizëm sot do të thotë garë demokratike me kombet e tjera për të mos mbetur në fund të listës për emancipimin qytetar, të mos mbesësh sot në fund për realizimin e demokracisë, prosperitetit dhe të shtetit ligjor.
Nacionalizëm do të thotë të luftosh krimin,korrupsionin, hajdutërinë dhe të mos të jesh në krye të Europës për kultivim e trafikim droge dhe as për eksportim të tyre e të krimit. Kombëtarizëm do të thotë kultivim dhe edukatë vlerash morale, zhvillim e progres dhe të mos jesh në krye të listës për eksod, largim të qytetarëve.
Nacionalizëm do të thotë përgjegjesi njerëzore individuale e kolektive për të mos i bërë dëm të tjerëve dhe shoqërisë, të japësh respekt e mirënjohje por edhe të kërkosh respekt e mirënjohje.
Nacionalizëm do të thotë kërkim dhe rrugëtim i pandërprerë për përsosje morale, do të thotë përpjekje e pandërprerë për më të mirën drejt të ardhmes e progresit.Individi dhe shoqëria gjithmonë duhet të përpiqen e të kenë kujdes për të mos rënë në shthurje morale dhe as pre e shpenzimeve dhe dëfrimeve dalldisëse prej parasë, alkoolit, drogës e prostitucionit; kombëtarizëm do të thotë moslargim nga moraliteti njerëzor.
Duhet kujdes për të mos u larguar nga traditat e mira dhe sidomos për të mos u larguar nga Feja e Vërtetë, për të mos u larguar nga besimi te Krijuesi i Plotfuqishëm. Nacionalizëm do të thotë individ, familje dhe shoqëri e shëndetshme; do të thotë familje, shoqëri dhe shtet ligjor, etik e të moralshëm.
Kombëtarizëm do të thotë kujtesë, respekt e mirënjohje për heronjt dhe për sakrificat e brezave të së shkuarës që kanë punuar e kryer vepra të mira në të mirë të kombit.
