Deri në orën 8:00 në Himarë kanë votuar 2.71% ose 563 nga 20786 zgjedhës në listën e QV të raportuara për të zgjedhur kryetarin e bashkisë.
Në garë janë Vangjel Tavo i Partisë Socialiste dhe Petro Gjikuria i opozitës. Pritet që të dy kandidatët të votojnë në orën 10:00. Ndërkohë në KQZ është raportuar që votimi në dy QV në Kuç ka nisur me një orë vonesë.
Është raportuar se në disa QV ka pasur debate mes komisionarëve nëse do të lejohen të votojnë apo jo votuesit me karta ID të skeduara. Sipas sekretarit të KZAZ 88 në Himarë, deri tani janë 70 votues që nuk kanë arritur të votojnë për shkak të kartave të ID të skaduara.
Komisionerët kanë marrë udhëzime që mos të lejohen të votojnë ata me karta ID të skaduara, ndërkohë në Himarë Fshat vazhdon i pezulluar votimi për shkak të këtij problemi deri në një përgjigje nga KQZ.
Sipas informacioneve, ka pasur disa problematika, kryesisht në Himarë Fshat, aty ku disa zgjedhës iu ka mbaruar afati i kartës së identitetit dhe mjeteve të identifikimit dhe si pasoj nuk janë lejuar për të votuar.
Zakonisht, Ministria e Brendshme duhet të nxjerr një urdhër paraprak për të lejuar ose jo, votuesit, të cilëve ju ka mbaruar vlefshmëria e mjetit të identifikimit, por deri më tani, nuk ka nxjerr asnjë urdhër dhe kësisoj KQZ është i prerë në vendimin e tij që nuk do të lejohet asnjë zgjedhës pa mjet identifikimi.
Një tjetër problem ka qenë ai i moshës. Një 100-vjeçar është paraqitur në qendrën e votimit, por nuk e ka gjetur emrin në listë. Kjo pasi të gjithë personat mbi 100 vjeç duhet të bëjnë një verifikim paraprak me një vendim gjykate.
Në fakt, në bashkinë e Himarës ka një kuriozitet. Janë mbi 130 persona që janë mbi 100 vjeç, që ditën e sotme, mesa duket të paktën deri më tani, do t’iu mohoet e drejta votës për shkak të moshës.
