Zgjedhjet në Himarë morën një angazhim dhe vëmendje politike të paprecedentë, edhe më shumë se një proces zgjedhor parlamentar. Ne nuk duam të ndalemi tek lufta politike, as tek kandidatët apo abuzimi që iu bë kandidatit të opozitës me “rrezikun e Vorioepirit” që do të kërcënonte Shqipërinë, po të fitonte ai.
Por, ne si PAA, analizuam me vëmendje procesin dhe referuam edhe konkluzionet e vëzhguesve vendorë. Në Himarë, ai që humbi së pari ishte procesi, humbi standardi i zgjedhjeve. Në Himarë u dëshmua se ne ende nuk bëjmë dot zgjedhje të lira, të drejta dhe të besueshme. Ja çfarë vëren organizata KRIIK në raportin e saj:
1. Presidenti i Republikës e caktoi datën e zgjedhjeve pa u konsultuar me partitë. Ka dyshime të forta se data u vendos në përputhje me axhendën elektorale të Partisë Socialiste.
2. Listat e zgjedhësve nuk u afishuan as në ambientet me akses të lirë për publikun në Bashki dhe as në ambientet e Qendrave të Votimit, në kundërshtim me ligjin.
3. Në lista ishin 311 zgjedhës të rinj që ishin transferuar nga qytete të tjera, kryesisht Tirana dhe Vlora. 30% e transferimit të zgjedhësve janë bërë brenda 4 ditësh, sapo është shpallur data e zgjedhjeve. Lëvizjet konsiderohen me efekt elektoral.
4. Mazhoranca në pushtet përdori burimet shtetërore dhe të tjera privilegje që vijnë nga të qenit në pushtet për avantazh elektoral edhe përgjatë kësaj fushate.
5. Përgjatë muajve maj dhe qershor 2024, Kryeministri Rama shpërndau certifikata pronësie për banorët e bashkisë Himarë, duke i përdorur këto evente institucionale për të bërë fushatë të parakohshme për z. Tavo, i cili e shoqëronte në këto takime. Rama e prezantoi atë si të ngarkuarin e tij për të zgjidhur problemet e pronësisë në Himarë.
Ne si PAA, vlerësojmë se këto parregullsi, dhe të tjera, kanë ndikuar thelbësisht në deformimin e realitetit zgjedhor. Ato kanë devijuar votën dhe kanë deformuar rezultatin. PS nuk ishte në garë si një parti politike, por si një shtet dhe pushtet i tërë. Të gjitha asetet qeveritare dhe shtetërore ishin në shërbim të kandidatit të saj.
Ajo që ndodhi në Himarë është në fakt një paralajmërim i frikshëm politik se kjo do të ndodhë edhe në zgjedhjet e përgjithshme 2025.
PAA i bën thirrje qeverisë të ndalojë përdorimin e aseteve publike dhe institucioneve shtetërore për qëllime elektorale.
PAA i bën thirrje institucioneve shtetërore shqiptare dhe atyre ndërkombëtare që mbulojnë çështjet zgjedhore, që të reagojnë ndaj sjelljes së partisë në pushtet si një parti-shtet.
PAA i bën thirrje përfaqësive diplomatike, mike të Shqipërisë, që të ushtrojnë ndikimin e tyre që këto praktika elektorale, haptazi antiligjore dhe jo demokratike, të ndalohen.
Ndryshe, zgjedhjet në vitin 2025 do të dëshmojnë se ne nuk do të jemi më një demokraci hibride, por një diktaturë hibride.
