“Gazzetta dello Sport” bën një pasqyrë të tregut të transferimeve të Milanit, duke shpjeguar se Ismael Bennacer do të mbetet jashtë planeve kuqezi nëse një klub bën ofertë të barabartë ose pak më të ulët se klauzola 50 milionë euro. Dy klube arabe janë në gjurmët e tij, Al-Ittihad dhe Al-Qadsiah. Po flasim për klube shumë të interesuara për mesfushorin, por pak ngurrues për të bërë oferta kaq të rëndësishme për kartonin.
Nëse Bennacer largohet, Milani do të bënte një lëvizje për Manu Konen, mesfushorin francez të Borussia Moenchengladbach. Gjatë fundjavës, i pyetur për ardhjen e mundshme të lojtarit të lindur në vitin 2001, Zlatan Ibrahimoviç është shprehur kështu: “Po e ndjekim Kone, pastaj do të shohim se çfarë do të ndodhë me merkaton tonë. Fofana i mbyll pak hapësirat për të, por kanë mbetur ende ditë deri në mbyllje të merkatos.
Strategjia që kemi zbatuar me ‘Milan Futuro’ është të mos bllokojmë talentet që kemi. Kur të jenë gati, nuk duam t’i bllokojmë me lojtarët e ekipit të parë. Me katër blerjet e kësaj vere kemi dyfishuar pozicionet, ne besojmë te talentet që kemi.
Për shembull, Torriani do të jetë zëvendësuesi i Maignan, pastaj do të luajë për pozicionin me Sportiello, sepse nuk duam t’i bllokojmë lojtarët e ‘Milan Futuro’. Ne nuk kemi frikë, duam të fitojmë dhe do të fitojmë”.
