Gjykata e Durrësit ka vendosur masën e sigurisë arrest me burg për biznesmenin dhe pronarin e rrjetit të lokaleve të striptizmit, Dodë Ricën. Mësohet se 47-vjeçari Dodë Rica i cili u arrestua më 22 gusht në Durrës, është pronar i rrjetit të lokaleve të striptizmit në Shqipëri dhe Kosovë, “Club Shqiponja”.
Dosja e cila lidhet me ekstradimin e Ricës në Kosovë, i ka kaluar Gjykatës së Tiranës pasi ky i fundit figuron banues në kryeqytet. Rica akuzohet për trafikim të njerëzve në Kosovë, dhe arrestimi i tij u bë i mundur për shkak të denoncimeve nga disa prej balerinave shqiptare dhe të huaja të cilat punonin në lokalet e tij.
Pas denoncimit, autoritetet kosovare informuan menjëherë homologët e Tiranës për lokalizimin dhe arrestimin e biznesmenit. Nga informacionet e siguruara nga inteligjenca policore të shkëmbyera mes Interpol Tiranës dhe agjencive në Kosovë, forcat e posaçme operacionale të Durrësit e lokalizuan të shpallurin në kërkim ndërkombëtar, në lagjen numër 13 të qytetit bregdetar.
Pronar i lokaleve të natës Club Shqiponja” në Tiranë dhe disa qytete të Shqipërisë prej vitit 2013, i cili ka hapur biznes edhe në Prishtinë në vitin 2022 me emrin tregtar “Cyborg Strip Club”, pritet të ekstradohet drejt Kosovës. Sakaq, Rica është hetuar edhe më parë për evazion fiskal në lidhje me biznesin në Prishtinë.
Nga 2 nëntori 2017 deri më 21 mars 2019, përmes biznesit “Shqiponja Strip Club”, Dodë Rica u hetua pasi dyshohej se ka kryer shmangie tatimore në shumën prej 36 mijë e 389 euro. Rica ka hapur pika të ‘Stript Club Shqiponja’ edhe në Kosovë e Shqipëri. Në 2020, Dodë Rica ka hapur në Kosovë ‘Hotel Jakova’ dhe në 2022 “Cyborg Strip Club”.
