Lulzim Basha ka zhvilluar takime me biznese të qytetit të Lezhës ku i ka njohur me ofertën që përmban programi i Demokratëve Euroatlantikë për këtë sektor.
Pasi dëgjoi shqetësimet dhe problematikat e panumërta të sipërmarrësve të këtij qyteti për shkak të politikave të gabuara dhe korrupsionit, Basha tha se programi është ndërtuar për t’iu përgjigjur nevojave të biznesit duke energjizuar sipërmarrjen, nxitjen e rritjes ekonomike dhe i jepë frymëmarrje tregut të lirë për të prodhuar kështu mirëqenie për familjet shqiptare.
Ai tha se taksa e sheshtë 9%, tatim fitimin 9%, dividendin 9% dhe me eliminimin e “taksës Rama” prej 240 lekësh nga çmimi i karburanteve, do të gjenerojë një zhvillim që do të ndihet në xhepin e çdo shqiptari.
Postimi i plotë i Bashës:
I dëgjoj me vëmendje shqetësimet e sipërmarrësve dhe problematikat e panumërta me të cilat përballen prej gjendjes në të cilin ndodhet ekonomia e vendit, për shkak të politikave të gabuara, keqmenaxhimit, klientelizmit dhe korrupsionit.
Ne jemi të bindur se ekonomia shqiptare meriton më shumë dhe kemi ndërtuar një ofertë që i përgjigjet nevojave të biznesit për të krijuar mundësi të reja zhvillimi.
Programi i Demokratëve Euroatlantikë, fryt i punës i ekspertëve më të mirë vendas e të huaj, energjizon sipërmarrjen shqiptare, nxit rritjen ekonomike, i jepë frymëmarrje tregut të lirë dhe prodhon mirëqenie për familjet shqiptare.
Përmes taksës së sheshtë 9%, tatim fitimin 9%, dividendin 9% dhe me eliminimin e “taksës Rama” prej 240 lekësh nga çmimi i karburanteve, do të gjenerojmë një zhvillim që do të ndihet në xhepin e çdo shqiptari.
Ulja e taksave do të fuqizoj prodhimin vendas dhe do çliroj potencialin e sipërmarrjeve, duke i lehtësuar nga dora e rëndë e një shteti arbitrar. Këto masa, të shoqëruara me eliminimin e tarifave të panevojshme, e reduktimin burokracive raskapitëse dhe luftën agresive ndaj korrupsionit, do prodhojnë rritje të aktivitetit ekonomik, rritje të invesitmeve, rritje të punësimit dhe rrijte të rrogave.
Shqipëria meriton më shumë!
