Shtatë persona janë vënë në pranga nga policia në kryeqytet, pasi kishin kthyer një magazinë në shtëpi bari, të zbuluar një ditë më parë në rrugën ‘Hamdi Pepa’ në Tiranë. 3 prej të arrestuarve janë punonjës të OSHEE.
Ndërkohë një person është në kërkim dhe një tjetër në hetim. Tre punonjësit e OSHE-së, Ervis Pashollari, Elton Cenaliu dhe Gëzim Gjonpali, akuzohen për ‘shpërdorim detyre’.
Sipas policisë ata nuk kanë konstatuar lidhjet e paligjshme, pasi zona ku ishte magazina ishte në mbikëqyrjen e tyre në rrugën Hamdi Pepa.
Erlind Tresa, Reshit Tresa, Asqeri Likaj, Elvis Lala kishin përshtatur një tunel nga kati i parë në katin e dytë të magazinës për kultivimin e bimëve narkotike me anë të llambave.
Edhe pse kati i dytë ishte i privatizuar dhe kishte tre pronarë, është lënë i braktisur. Të dyshuarit kanë parë që nuk interesohej asnjë dhe nuk ishte në funksion kati i dytë, e kanë shfrytëzuar në mënyrë të fshehtë për ta përshtatur në shtëpi bari.
Energjinë elektrike e kanë marrë nga kati i parë duke krijuar lidhje të paligjshme.
Njoftimi i Policisë
Finalizohet operacioni policor i koduar “Tuneli”, për goditjen e veprimtarisë kriminale në fushën e kultivimit të bimëve narkotike me anë të llambave.
Operacioni u zhvillua nga Komisariati i Policisë Nr. 2 në bashkëpunim me Sektorin për Hetimin e Narkotikëve.
Gjatë operacionit është zbuluar një ambient i përshtatur për kultivimin e kanabisit, me anë të llambave, në një objekt ku kishte lidhje të paligjshme elektrike.
Arrestohen 7 shtetas, 3 prej tyre punonjës të OSHEE-së.
Shpallet në kërkim një tjetër dhe procedohet penalisht një 39-vjeçare, për moskallëzim krimi.
Shërbimet e Komisariatit të Policisë Nr. 2 në bashkëpunim me Sektorin për Hetimin e Narkotikëve, në vijim të punës për parandalimin, evidentimin dhe goditjen e veprimtarisë kriminale në fushën e narkotikëve, organizuan dhe finalizuan operacionin policor të koduar “Tuneli”.
Në kuadër të këtij operacioni u arrestuan shtetasit:
– E. T., 28 vjeç, banues në Tiranë, për veprat penale “Kultivimi i bimëve narkotike” dhe “Vjedhja e energjisë elektrike ose impulseve telefonike” kryer në bashkëpunim, i dënuar më parë në Gjermani për kultivim bimësh narkotike;
– Sh. T., 57 vjeç, A. L., 59 vjeç, E. L., 26 vjeç, të tre banues në Tiranë, për veprat penale “Kultivimi i bimëve narkotike” dhe “Vjedhja e energjisë elektrike ose impulseve telefonike” kryer në bashkëpunim;
– E. P., 40 vjeç, banues në Tiranë, me detyrë përgjegjës i grupit të monitorimit të OSHEE-së, për veprën penale “Shpërdorimi i detyrës”;
– E. C., 47 vjeç, banues në Tiranë, me detyrë elektriçist pranë OSHEE-së për veprën penale “Shpërdorimi i detyrës”;
– G. Gj., 59 vjeç, banues në Tiranë, me detyrë faturist pranë OSHEE-së për veprën penale “Shpërdorimi i detyrës”.
Gjithashtu u procedua penalisht shtetasja H. D., 39 vjeçe, banuese në Tiranë, për veprën penale “Moskallëzimi i krimit”.
Po në kuadër të këtij operacioni, u shpall në kërkim për veprat penale “Kultivimi i bimëve narkotike” dhe “Vjedhja e energjisë elektrike ose impulseve telefonike” kryer në bashkëpunim, shtetasi S. K., 46 vjeç, banues në Tiranë.
Shtetasit E. T., Sh. T., A. L., E. L., dhe S. K., në një magazinë në rrugën “Hamdi Pepa” kishin përshtatur një tunel, nga kati i parë në katin e dytë të magazinës, për kultivimin e bimëve narkotike me anë të llambave. Punonjësit e OSHEE, nuk kanë konstatuar lidhjet e paligjshme të energjisë elektrike në këtë ambient, në zonën që ata kishin në monitorim, ndërsa shtetasja H. D., ka pasur dijeni për këtë veprimtari kriminale dhe nuk ka kallëzuar pranë organeve kompetente.
Gjatë zhvillimit të operacionit janë gjetur dhe sekuestruar 193 bimë kanabis të kultivuara në vazo (183 prej tyre janë asgjësuar me anë të djegies ndërsa 10 janë dërguar për ekzaminime të mëtejshme), 100 bimë të thara të futura nëpër thasë, llamba elektrike, ventilatorë, tuba plastikë, pajisje aspirimi, filtra, bobina dhe sende të tjera që shërbejnë për kultivim bimësh narkotike me anë të llambave.
Materialet i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë.
