Kylian Mbappe është raportuar në polici si i dyshuar për përdhunim në një hotel në qendër të Stokholmit sipas medieve në Suedi.
Paditësja, një grua, ka kërkuar mjekim dhe ka veçuar yllin francez të futbollit si autor.
“Tani janë duke u ndërmarrë një sërë masash hetimore”, thotë prokurorja Marina Çirakova për televizionin suedez, “TV4”
Lojtari i Real Madridit, Kylian Mbappe bëri një vizitë të shkurtër në Suedi javën e kaluar. Pas dy ditësh qëndrimi në Stokholm, ai u largua nga vendi të premten pasdite me një avion privat.
Pas qëndrimit, i cili ndër të tjera ka kaluar në një klub nate dhe restorante, francezi tashmë po hetohet nën dyshimin për përdhunim, sipas informacioneve të dhëna për televizionin suedez TV4.
Një grua kërkoi trajtim në një repart spitalor për viktimat e përdhunimit të shtunën dhe raportoi se ishte sulmuar seksualisht nga Kylian Mbappe. Kjo sipas të njëjtave të dhëna.
Policia përpiloi një kallëzim përdhunimi dhe Kylian Mbappe ishte i dyshuar në mënyrë të arsyeshme, shkalla më e ulët e dyshimit.
Sipas “Expressen”, ai po hetohet edhe për ngacmim seksual.
Skena e caktuar e krimit është hoteli “Bank” në qendër të Stokholmit, ku ylli i futbollit qëndroi me shoqëruesit e tij.
Teknikët e policisë kanë kryer hetime në vendngjarje.
Prokurorja që drejtoi hetimin paraprak konfirmon se në polici është marrë një kallëzim i dyshuar për përdhunim, por nuk ka dhënë shumë informata.
“E vetmja gjë që mund të them është se ka ndodhur një incident, një krim, i cilësuar si përdhunim dhe që është kryer më 10 tetor në qendër të Stokholmit, në një hotel. Nuk mund të konfirmoj apo mohoj nëse një person i caktuar është i përfshirë në këtë”, thotë prokurorja Marina Çirakova.
“Po merren një sërë masash hetimore. Unë nuk do të hyj në atë se cilët janë ata”.
Mbrëmjen e së hënës, futbollisti iu përgjigj akuzave në një shkrim në “X”.
“Lajme të rreme”, ka shkruar Mbappe.
TV4 ka kërkuar një koment edhe nga avokati i paditëses.
