Papa Françesku shpalli sot kanonizim 14 persona, mes të cilëve edhe “dëshmorët e Damaskut”, të vrarë në Siri gjatë Perandorisë Osmane, të cilët janë simbol i persekutimit të krishterë dhe Ati i Shenjtë udhëhoqi ceremoninë e shenjtërimit në sheshin “Shën Pjetri” në prani të mijëra besimtarëve nga e gjithë bota.
“Po i regjistrojmë në mesin e shenjtorëve”, tha Papa, duke shqiptuar secilin emër veç e veç.
Kanonizimi, pas lumnimit, është hapi i fundit drejt shenjtërimit në Kishën Katolike. Kërkohen tri kushte, më e rëndësishmja prej të cilave është që individi të ketë kryer të paktën dy mrekulli. Ai ose ajo duhet të ketë vdekur për të paktën pesë vjet dhe duhet të ketë bërë një jetë shembullore të krishterë derisa ishte gjallë.
Në mesin e grupit janë 11 persona të njohur si “Dëshmorët e Damaskut”, të cilët u kanonizuan rreth 160 vjet pas vdekjes së tyre. Tetë fretër françeskanë dhe tre maronitë laikë (të krishterë arabisht-folës), të gjithë nga i njëjti manastir, u vranë në korrik 1860 nga militantët druzë në kryeqytetin e Sirisë, atëherë nën sundimin osman. Papa Piu XI i shpalli të bekuar në vitin 1926.
Damasku është shtëpia e një prej komuniteteve më të vjetra të krishtera në botë, por popullsia e saj e krishterë është zvogëluar në vetëm rreth 2 për qind sot, sipas Vatikanit. Qytetarë të shumtë, të krishterë dhe anëtarë të besimeve të tjera, u larguan nga qyteti pas fillimit të luftës civile në Siri në vitin 2011.
Martirizimi i grupit të kanonizuar nga Damasku “nuk ndryshon shumë nga situata në të cilën gjenden sot shumë të krishterë në Lindjen e Mesme”, shkruan Vatican News, portali zyrtar i lajmeve të Vatikanit.
Tre personat e mbetur që Françesku i shenjtëroi të dielën vdiqën në fillim të shekullit të 20-të dhe ata themeluan bashkësi fetare. Ata janë misionari italian Giuseppe Allaman, murgesha italiane Elena Guerra dhe kanadezja Marie-Leonie Paradis.
