Arkitekti dhe ish-zëvendësministri i Zhvillimit Urban, Gjon Radovani, ka reaguar në lidhje me informacionet se celulari i tij ka zbuluar skemën e rikonstruksionit të disa komisariateve në vend, pas vendimit të Ministrisë së Brendshme.
Ndërkohë, deputeti socialist Plarent Ndreca është zyrtarisht i pandehur dhe SPAK pretendon se ai ka shkelur ligjin gjatë kohës që ka shërbyer si Sekretar i Përgjithshëm në Ministrinë e Brendshme, lidhur me tenderat për komisariate.
Radovani shpjegon se kompania e tij ka marrë pjesë në garë për rikonstruksionin e komisariateve në Shqipëri dhe ka fituar projektin për Vlorën dhe Rrëshenin. Ai thekson se punimet janë kryer dhe taksat janë paguar, por Ministria e Brendshme ende nuk ka bërë pagesat për këto shërbime.
“Edhe sot, fatura për punën e kryer nuk është likuiduar nga Ministria e Brendshme, dhe dy kompanitë që morën pjesë në bashkimin e operatorëve ekonomik po përballen me rrezikun e falimentimit. Ata kanë paguar taksat sikur të kishin marrë paratë për faturën, por nuk kanë marrë asgjë”, shprehet Radovani.
Ai dhe disa kolegë kanë kontaktuar herë pas here funksionarë të Ministrisë për të kërkuar pagesat e munguara, por asnjë masë nuk është marrë për të zgjidhur këtë çështje. Në këtë situatë, ata kanë vendosur të angazhojnë një avokat për të ndjekur rrugën ligjore.
“Për këtë arsye, kam në dispozicion të gjithë dokumentacionin që vërteton të vërtetën e kësaj situate,” përfundon Gjon Radovani.
Reagimi i plotë:
Duke marrë shkak nga informacione të mediave shqiptare të ditës së sotme në të cilat përmëndet edhe emri im dhe duke konstatuar se informacionet e dhëna për publikun janë ose pjesërisht të sakta ose të pasakta deklaroj si më poshtë:
1. Në vitin 2019 unë, ark. Gjon Radovani kam marrë pjesë në një KONKURS PROJEKTIMI të organizuar nga Ministria e Brëndëshme me temë: “Studim projektimi për disa projekte tip, objekte të Policisë së Shtetit”
2. Pjesëmarrja në konkurs është bërë nëpërmjet bashkimit të operatorëve ekonomik “Derby-E” dhe “APE.shpk”, kjo e fundit në pronësinë time.
3. Unë si arkitekt i pavarur kam bërë një kontratë bashkpunimi me bashkimin e operatorëve ekonomik në bazë të së cilës unë do të zhvilloja projekt idenë dhe normativat e projektimit të komisariateve, ndërsa dy shoqëritë do të zhvillonin projektet e zbatimit nën mbikqyrjen time në rast nevoje, në rast lidhjeje kontrate. 4. Bashkimi i operatorëve ekonomik “Derby-E” dhe “APE.shpk” është shpallur fitues i konkursit të projektimit.
5. Në bazë të termave të referencës së konkursit faza e konkursit të projektimit ka qënë pa rimbursim ekonomik.
6. Bashkimi i operatorëve ekonomik në bazë të termave të referencës së konkursit ka lidhur kontratë bashkpunimi për projektimin ekzekutiv të dy reparteve të Policisë së Shtetit, atë të Vlorës dhe atë të Rrëshenit.
7. Bashkimi i operatorëve ekonomik ka dorëzuar projektin e zbatimit pranë MB dhe sipas kontratës ka lëshuar faturën tatimore.
8. Bashkimi i operatorëve ekonomik ka paguar tatimin mbi vlerën e shtuar për faturën e lëshuar.
9. Edhe sot e kësaj dite fatura për punën e bërë nuk është likuiduar nga MB dhe dy shoqëritë e bashkimit të operatorëve ekonomik janë në limitet e falimentit, sepse përvec që nuk janë paguar për punën e bërë, kanë paguar edhe taksat sikur të kishin arkëtuar shumën e faturës.
Në këto kushte unë dhe kolegë të tjerë të përfshirë në projekt me të drejtë kemi kontaktuar kohë pas kohe funksionarët e MB për të kërkuar të drejtën tonë të munguar. Pas një kalvari prej tre vitesh të gjendur para një padrejtësie për ne tashmë të pazgjidhshme i kemi kaluar çështjen një avokati për të marrë rrugën e mundshme të një procesi civil kundër debitorit.
Për sa më sipër posedoj të gjithë dokumentat që faktojnë se kjo është e vërteta dhe vetëm e vërteta e kësaj çështje.
