Avokati Përparim Çaça, për draftin për kontrollin e drejtësisë, ku deputeti socialist Fatmir Xhafaj njoftoi se do të jenë 12 tryeza diskutimi, thotë se komisioni antikorrupsion duket i dështuar qysh në fillim.
“Edhe dje konferenca për shtyp e zotit Xhafaj më shumë mu duk një lloj justifikimi se pse po dështon. Kemi të bëjmë me një komision të njëanshëm, nuk është një komision bipartizan.
Produkti që do të dalë do të jetë gjithsesi i njëanshëm dhe nuk e di nëse do i ketë votat për ndryshimin e Kushtetutës.
Tashmë po hyjmë në fushatë elektorale nuk jemi më në pjesën paraelektorale.
Duke qenë se institucionet ligjzbatuese më të rëndësishme të këtij vendi e kanë bojkotuar, nuk mjafton të marrësh 70 ekspertë nga bota apo brenda, kur në fakt ekspertët më të mirë janë ata që e kanë punë të përditshme dhe kanë parë problematikat si Gjykata e Lartë, Gjykata Kushtetuese, SPAK.
Te reforma në drejtësi duhet të ndërhyhet por jo në këtë lloj mënyre.”
I ftuar në një intervistë televizive, Çaça tha se nëse ne vazhdojmë të krijojmë komisione dhe nënkomisione, nuk bëjnë asgjë tjetër vetëm i mbivendosen institucioneve kushtetuese të vendit, duke shtuar se duhet të qartësohet se cili do të jetë objekti i tij.
Sipas tij ky është komisioni i Partisë Socialiste dhe nuk duhet të bëhet në Kuvend, pasi nëse do të jetë i tillë do të jenë pjesë edhe grupet parlamentare.
“Nuk është e përcaktuar qartë se kush do të jetë objekti i këtij komisioni në të vërtetë. E shoh thjesht si show të qeverisë.
Klasa politike është e interesuar të minimizojë pushtetin e SPAK.”
