Nga Skënder Sadri KAPITI
SHBA, historikisht dhe gjithmonë kanë qenë dhe janë përkrah dhe në mbështetje të Shqipërisë dhe shqiptarëve. Edhe sot,përkushtimi i aleatit të madh të Shqiptarëve në mbështetje të Shqipërisë ka ardhur ne rritje për ta çuar Shqipërinë përpara drejt progresit, drejt drejtësisë, drejt mposhtjes dhe të fitores kunder korrupsionit, drejt sigurisë së sovranitetit shtetëror dhe të integrimit në BE sepse SHBA e konsiderojnë Shqipërinë mik dhe aleat besnik të tyre dhe prandaj ato edhe duan një Shqipëri demokratike dhe të fortë.
Paramendojeni për një çast edhe se: sikur BE mos ta ketë aleat dhe mbështetjen e SHBA-ve, kush do ta kishte penguar avancimin dhe kërcënimin rus në Europë? A do të mundej vetë Europa pa SHBA-të që ta mbështeste Ukrainën kundër Rusisë? Kur këto janë të vërteta të mëdha, por atëherë vjen logjikshëm edhe pyetja se pa ndihmën dhe mbështetjen e SHBA-ve, Shqipëria e Kosova a mund të ishin të sigurta nga provokimet,kërcënimi dhe rreziku nga destabilizimi serb e rus? Pa ndihmën dhe mbështetjen më se 100 vjeçare të SHBA-ve e sotmja, e ardhmja dhe perspektiva shqiptare nuk do të kishte pasur kurrë këtë që shqiptarët kanë sot. Nuk do të kishim sot dy shtete shqiptare, pasi si Shqipëria ashtu edhe Kosova i detyrohen ekzistencës së tyre shtetërore ndihmës dhe mbështetjes vendimtare të SHBA-ve.
Më 1913, ambasadorët e shteteve më të fuqishme të Europës duke kënaqur Rusinë (Xhandarin Ndërkombëtar të asaj kohe), europianët mbwshtetwn dhe realizuan synimet e pretendimet e fqinjëve shoviniste sllavë, grek e ortodoks, shkëputën nga trupi krahinën e Kosovës dhe të trojeve të tjera shqiptare duke ua falur Serbisë, Greqisë e Malit të Zi. Gjatë Luftës Parë Botërore, Europa shkoi edhe më tej dhe akoma më rëndë e më keq kundër shqiptarëve: bëri një traktat për copëtimin e të gjithë Shqipërisë, duke ua ndarë atë fqinjve grekë, italianë, serbë e malazezë. Kështu, Shqipëria e copëtuar u ndodh në fund të Luftës së Parë Botërore para rrezikut të shpërbërjes përfundimtare. Traktati i fshehtë i Londrës, ndërmjet Antantës dhe Italisë më 26 prill 1915, parashikonte ndarjen e tokave shqiptare mes Italisë, Greqisë e Serbisë e Malit të Zi.
Ishte Presidenti amerikan i cili nuk e lejoi këtë masakër kundër shqiptarëve dhe ai garantoi ekzistencën e Shtetit shqiptar, se sa për Europën, Shqipëria do ishte fshirë nga harta.
Po kështu janë po SHBA-të ato të cilat pas luftës së Dytë Botërore nuk lejuan gllabërimin e Shqipërisë nga ish-Jugosllavia, dhe pavarësisht se Shqipëria socialisto-enveriste ishte më anti-SHBA se sa edhe vetë Bashkimi Sovjetik, përsëri SHBA-të ishin garant dhe mbronin Shqipërinë nga rreziku shovinist grek e sllav.
Janë po SHBA-të ato të cilat e ndihmuan Shqipërinë në shembjen e komunizmit, në rrugën e demokratizimit të saj, në anëtarësimin në NATO.
Janë po SHBA-të që e mbështesin sot Shqipërinë edhe në integrimin në BE, në ndërtimin e shtetit modern e ligjor, janë SHBA-të që mbështetën Veting-un në drejtësi, këtë Reformë jetike për shqiptarët, Reformë e cila e çliroi Shqipërinë nga korrupsioni dhe nga kërcënimi prej tij të sovranitetit kombëtar. Reforma në drejtësi dhe SPAK-u po çprangos sistemin nga krimi dhe hajdutëria shtetërore, pasi këto nuk është në gjendje që t’i kryejë vetë politika shqiptare, por madje përkundrazi, vetë politika shqiptare ishte por edhe është akoma vetë problemi më i madh që shqetëson dhe preokupon shqiptarët, si një politikë anti-publike, e stërkorruptuar, tradhtare dhe e mosinteresimit për interesin zhvillimor, demokratik dhe integral të shtetit e të shoqërisë shqiptare.
Po kështu nuk do të kishim shtetin shqiptar të Kosovës pa rolin historik e vendimtar të SHBA-ve, dhe që këtë rol ndihmës e mbështetës vendimtar, rol garancie e sigurie për Kosovën e luajnë edhe sot SHBA-të. Janë SHBA-të ato prej të cilave Kosovës i erdhën edhe njohjet më të mëdha të Shtetit të Kosovës nga shtetet e vendet e Botës. Janë po SHBA-të avokati dhe mbështetësi më i madh i Kosovës për integrimin e saj në organizata e organizma ndërkombëtarë. Janë po SHBA-të ato të cilat mbrojnë dhe garantojnë sigurinë dhe mbrojtjen e dy shteteve shqiptare të cilat janë dy shtetet më të dobëta në rajon dhe Europë ekonomikisht e ushtarakisht.
Dhe logjikshëm pra vjen edhe pyetja se çfarë janë edhe sot në gjendje të bëjnë vetë shqiptarët pa ndihmën e SHBA-ve?
