Një shkëmb me vija i identifikuar nga roveri Mars Perseverance ka tërhequr vëmendjen e shkencëtarëve për historinë e Planetit të Kuq. I quajtur “Kështjella Freya”, ky shkëmb, që mund të ketë origjinë vullkanike, u zbulua në shpatet e kraterit Jezero. Përdorimi i instrumentit Mastcam-Z ka mundësuar fotografimin dhe matjet e para, që sugjerojnë se struktura e tij është ndikuar nga procese magmatike ose metamorfike. Megjithatë, origjina e këtij shkëmbi mbetet mister, duke lënë hapësirë për spekulime se ai mund të ketë rrokullisur nga shkëmbinj të tjerë më lart.
Athanasios Klidaras, një student doktorature në Universitetin Purdue, shprehu optimizëm për zbulimin e më shumë shkëmbinjve të tillë gjatë misionit. Kjo gjetje është pjesë e një eksplorimi më të gjerë, pasi në maj 2024, Perseverance kishte hasur gjithashtu një fushë guri të quajtur Mount Washburn, ku u identifikua një shkëmb me ngjyrë të ndryshme. Shkencëtarët janë të kënaqur me zhvillimet e deritanishme dhe presin të zbulojnë më shumë informacione për planetin.
NASA, agjencia hapësinore e qeverisë amerikane, po bashkëpunon me SpaceX për të dërguar astronautët në Mars, dhe beson se një ulje e parë me ekuipazh deri në vitin 2040 do të ishte “e guximshme”. Megjithatë, miliarderi Elon Musk ka bërë thirrje për një plan të tillë që prej vitit 2016, duke sugjeruar se fluturimet e para me ekuipazh mund të ndodhin brenda gjashtë viteve, edhe pse raketat e nevojshme ishin ende në fazën e konceptit.
Ndonëse disa mund ta shohin këtë si një mburrje, disa analistë e shohin të arritshme realizimin e fluturimeve të rregullta të anijeve nga Toka në Mars me raketat Starship të SpaceX, që do të transportojnë ngarkesa dhe eksploruesit e parë njerëzorë.
