Zoti Balla, jeni një nga deputetët më të rinj të Partisë Socialiste në Durrës, por me një rol gjithnjë e më aktiv. Si po e përjetoni këtë fazë të karrierës suaj politike dhe cila është qasja juaj ndaj kësaj përgjegjësie?
Ju falënderoj për këtë mundësi. Të jem deputet i Partisë Socialiste dhe përfaqësues i qytetarëve të Durrësit është një nder dhe përgjegjësi e madhe. Politikën e shoh si një mjet për të përmirësuar jetët e njerëzve dhe për t’u dhënë zë shqetësimeve të tyre. Angazhimi im ka qenë gjithmonë në shërbim të komunitetit, duke dëgjuar zërin e qytetarëve dhe duke u fokusuar në çështjet që kanë rëndësi për ta. Për mua, ky është një rrugëtim që kërkon përkushtim, transparencë dhe energji të reja, dhe unë jam i vendosur të bëj më të mirën time në çdo nismë që unë apo Partia Socialiste ndërmerr.
Kemi parë një aktivizim të Partisë Socialiste në Durrës, veçanërisht këtë vit. A mund të ndani diçka nga masat e marra për përgatitjen për sfidën elektorale të vitit të ardhshëm?
Është e vërtetë që jemi angazhuar intensivisht në forcimin e strukturave tona në Durrës. Këtë vit kemi mirëpritur rreth 2000 anëtarë të rinj, një shenjë që tregon besimin që njerëzit kanë ndaj Partisë Socialiste dhe vizionit tonë për qytetin. Po ashtu, kryeministri Rama ka këmbëngulur shumë në përmirësimin dhe promovimin e platformës “Deputeti që Duam,” një sistem vlerësimi që ndihmon për të siguruar që çdo deputet dhe strukturë politike të jetë sa më efektive dhe transparente. Ky është një angazhim serioz për të qenë gjithmonë pranë qytetarëve dhe për t’u përgjigjur me efikasitet nevojave të tyre.
Duke qenë se ju jeni një nga deputetët më të rinj, si e shihni rolin e rinisë në politikë dhe si mund të angazhohen më shumë të rinjtë në zhvillimin e vendit?
Rinia ka një rol të jashtëzakonshëm në zhvillimin e vendit, dhe janë një segment që duhet të përfshihet më shumë në vendimmarrjen politike. Të rinjtë sjellin ide të reja, energji pozitive dhe shumë krijimtari në çdo aspekt të shoqërisë. Ne si Parti Socialiste po punojmë shumë për të krijuar mundësi që rinia të jetë pjesë e çdo niveli të politikës, duke filluar nga organizatat rinore deri tek pozitat më të larta politike. Në Durrës i kemi përfshirë të rinjtë në proceset vendimmarrëse, duke i angazhuar ata në forumet lokale dhe grupe pune që merren me zhvillimin e projekteve që kanë impakt në jetën e përditshme të qytetarëve. Rinia duhet të ndjejë që ka mundësi të ndikojë në vendimmarrje dhe që kontributi i saj është i mirëpritur dhe i vlerësuar.
Procesi i rindërtimit në Durrës ka qenë një prioritet pas tërmetit shkatërrues të vitit 2019. Cili është bilanci i deritanishëm dhe si e shihni ecurinë e këtij procesi?
Rindërtimi ka qenë dhe mbetet një prej sfidave më të mëdha për qytetin tonë, por jam krenar të them që kemi bërë progres të jashtëzakonshëm. Deri tani, kemi përfunduar ndarjen e rreth 990 apartamenteve për familjet që humbën shtëpitë e tyre. Kemi përmirësuar infrastrukturën dhe kemi transformuar zona të tëra, duke siguruar një standard më të lartë jetese për qytetarët. Për mua, rindërtimi nuk është thjesht një çështje infrastrukturash, por edhe rikthimi të shpresës dhe sigurisë për banorët e Durrësit.
Një tjetër çështje e nxehtë ka qenë ajo e mbetjeve të rrezikshme. Opozita ka ngritur kritika ndaj qeverisjes. Çfarë mund të thoni për këtë?
Ajo që mund të them është se çështja e mbetjeve është një sfidë komplekse dhe është aktualisht nën hetim nga Prokuroria e Durrësit. Vlen të theksoj se mbetjet janë depozituar në një zonë të sigurt dhe janë të monitoruara 24 orë.
- Balla, si mund të komentoni masat e fundit të qeverisë për pensionistët. Dhe si do të mund të sigurohet që kjo mbështetje financiare të jetë afatgjatë, duke pasur parasysh sfidat e skemës aktuale të pensioneve?
Kam biseduar shpesh me pensionistët e Durrësit dhe jam shumë i lumtur që qeveria ka qenë e angazhuar vazhdimisht për t’i mbështetur ata. Për vitin 2024, qeveria ka shpallur një fond prej 100 milionë eurosh për shpërndarjen e bonusit të fundvitit. Ky bonus do të ndahet në dy shkallë: pensionistët që marrin deri në 20,000 lekë do të përfitojnë trefishin e bonusit të vitit të kaluar, në vlerën e 150 eurove, ndërsa pensionistët me pension më të lartë se 20,000 lekë do të marrin dyfishin e bonusit të mëparshëm, ose 100 euro. Përtej kësaj, ne jemi duke punuar që të sigurojmë që kjo mbështetje financiare të konsolidohet dhe të vazhdojë për brezat që vijnë. Përmes masave afatgjata si indeksimi i pensioneve dhe përpjekjeve për përmirësimin e qëndrueshmërisë së sistemit, synojmë të ofrojmë mbështetje më të qëndrueshme. Dua të siguroj gjithë moshën e tretë që angazhimi ynë është që asnjë pensionist të mos ndjehet i lënë pas.
Si e vlerësoni procesin e zgjedhjes së Drejtorëve të Policisë, edhe kjo një çështje që ka ngjallur debat politik dhe publik, sidomos kur vendi ka kaluar disa situate të vështira me krimin.
E shoh si hap thelbësor për forcimin e sistemit të rendit dhe sigurisë në Shqipëri. Pas miratimit të ligjit për policinë e shtetit, procesi i zgjedhjes së drejtorëve të policisë dhe drejtuesve të strukturave të tjera ka qenë i hapur dhe transparent, duke u bazuar në konkurse dhe kriteret e merituara. Kjo është hera e parë që realizohet një proces i tillë, dhe unë besoj fort se kjo do të ndikojë drejtpërdrejtë në besimin që qytetarët kanë ndaj policisë, pasi ata tashmë shohin një strukturë më të organizuar, që e ka vendosur transparencën dhe meritokracinë në qendër të funksionimit të saj.
Ka pasur shumë diskutime rreth emërimeve të drejtorëve në nivel rajonal në Durrës, sidomos pas disa ndryshimeve që u bënë gjatë periudhës së fundit. A mund të na sqaroni nëse këto ndryshime janë rezultat i një procesi të kujdesshëm dhe të bazuar në meritokraci, apo ka pasur edhe ndikime politike në këtë proces?
Ky proces është realizuar duke u bazuar në kritere të qarta dhe objektive për të siguruar një administratë më të përgjegjshme dhe efikase. Pra, këto emërime janë bërë duke marrë parasysh kapacitetet profesionale dhe eksperiencën e individëve, dhe janë pjesë e një angazhimi të përgjithshëm për të sjellë ndryshime pozitive në sektorët e administratës publike. Procesi është shumë më i hapur, dhe kjo është ajo që ne synojmë, që drejtuesit të jenë të zgjedhur për aftësinë e tyre për të menaxhuar institucionet dhe për të sjellë rezultate konkrete për qytetarët.
Duke qenë se Durrësi është një qendër kryesore turistike, si e shihni të ardhmen e këtij sektori dhe çfarë hapash po merren për të përmirësuar ofertën turistike të qytetit?
Turizmi është shtylla kryesore e ekonomisë së Durrësit dhe një pasuri kombëtare që duhet ta ruajmë dhe zhvillojmë. Kemi investuar në projekte strategjike si “Parku Vala” dhe “Eco Park” në Spitallë, të cilat synojnë krijimin e hapësirave atraktive, duke ofruar mundësi të reja për rekreacion. Eco Park-u, për shembull, është ndërtuar në një zonë që më parë shërbente si vendgrumbullim mbetjesh, dhe tani është një hapësirë e pastër dhe e gjelbër që përmirëson cilësinë e jetesës për qytetarët. Po ashtu, një nga sfidat më të mëdha që ka ndikuar jo vetëm në turizëm, por edhe në cilësinë e jetesës në Durrës, është sistemi i ujësjellës-kanalizimeve. Kemi planifikuar investime të mëdha për të adresuar këtë problem, duke nisur me një projekt të gjerë për rinovimin dhe zgjerimin e rrjetit të ujësjellës-kanalizimeve për gjithë qytetin. Ky projekt do të realizohet me buxhetin e vitit 2025 dhe do të sigurojë një infrastrukturë moderne dhe efikase që do të kontribuojë në përmirësimin e kushteve të jetesës dhe turizëm.
Si po zhvillohen planet për të zgjeruar sezonin turistik në Durrës për të pritur turistët gjatë gjithë vitit, dhe jo vetëm në muajt e verës?
Durrësi ka bërë hapa të rëndësishëm për t’u kthyer në destinacion tërheqës, që mund të vizitohet gjatë gjithë vitit. Sipas të dhënave të Ministrisë së Turizmit dhe Mjedisit, Shqipëria ka shënuar një rritje të numrit të vizitorëve gjatë periudhës janar-tetor 2024, duke arritur një total prej 10,4 milionë vizitorësh të huaj. Nga ana tjetër, Durrësi ka pësuar gjithashtu një rritje të vizitave nga turistët, gjë që mund ta shohim me sy të lirë edhe gjatë këtyre ditëve të nëntorit. Gjatë periudhës 1 qershor – 15 shtator, vetëm nga pika kufitare e portit të Durrësit, janë regjistruar mbi 440 mijë udhëtarë. Është vënë re një interes i shtuar për atraksionet historike dhe arkeologjike të qytetit. E megjithatë ka ende sfida, veçanërisht ato që lidhen me shërbimin ndaj turistëve.
Si do ta përshkruanit zhvillimin ekonomik të Durrësit në vitet e fundit dhe çfarë hapash do të merren për të nxitur më tej rritjen ekonomike?
Durrësi ka një potencial të jashtëzakonshëm për zhvillim ekonomik, duke qenë një qytet me një pozicion të privilegjuar gjeografik dhe një port që është thelbësor për ekonominë e Shqipërisë. Kemi parë një rritje të investimeve në sektorë të ndryshëm, si turizmi, ndërtimi, dhe infrastruktura. Pjesë e këtij zhvillimi është edhe projekti i Portit të Ri, i cili do të kontribuojë jo vetëm në rritjen e volumit të tregtisë, por edhe në krijimin e mundësive të reja pune për qytetarët. Përveç kësaj, po punojmë për të ndihmuar bizneset e vogla dhe të mesme, duke ofruar mbështetje dhe infrastrukturë që mundësojnë krijimin e mundësive të reja për sipërmarrësit. Vetë kam vizituar shumë biznese për të degjuar shqetësimet dhe kërkesat e tyre. E ardhmja e Durrësit është në duar të qytetarëve të tij, dhe duke qenë pranë tyre unë dua t’i garantoj që zëri dhe kërkesat e tyre do të merren në konsideratë.
Një temë tjetër e rëndësishme është diaspora dhe roli i saj në jetën politike dhe sociale të vendit. A po ndërmerren hapa për të siguruar të drejtën e votës për shqiptarët jashtë vendit?
Absolutisht po. Vota e diasporës është një angazhim madhor për Partinë Socialiste dhe për Kryeministrin Rama. Po punojmë për të siguruar një kuadër ligjor dhe infrastrukturë që do të mundësojë votimin e shqiptarëve që jetojnë jashtë vendit. Ne besojmë që diaspora është një aset i rëndësishëm për Shqipërinë dhe se e drejta për të votuar është një pjesë e pandashme e integrimit të saj në proceset politike të vendit. Siç e keni parë, vizitat e kryeministrit Rama me shqiptarët e Diasporës janë pritur shumë mirë, ç’ka na jep shpresën që edhe angazhimi i tyre përmes investimeve ne vend do të rritet.
Si përmbyllje, cili është mesazhi juaj për qytetarët e Durrësit dhe për ata që ndjekin me interes punën tuaj?
Mesazhi im është i thjeshtë dhe i sinqertë: Ju falënderoj për besimin dhe mbështetjen tuaj. Jam këtu për të punuar për ju dhe me ju, duke adresuar sfidat dhe duke realizuar projekte që përmirësojnë cilësinë e jetës në qytetin tonë. Durrësi ka shumë potencial dhe mundësi, dhe ne si qeveri do të vazhdojmë të punojmë për të krijuar mundësi për rritje dhe zhvillim për të gjithë qytetarët. Po ashtu, besoj se ne do të kemi një Durrës me më shumë mundësi për të rinjtë, ku ata të mund të gjejnë mundësi për t’u punësuar dhe ndërtuar jetën e tyre.
- Balla, si mund të komentoni masat e fundit të qeverisë për pensionistët. Dhe si do të mund të sigurohet që këto mbështetje financiare të vazhdojnë në periudhën afatgjatë, duke pasur parasysh sfidat që sjell deficiti i skemës aktuale të pensioneve?
Kam biseduar shpesh me pensionistët e Durrësit dhe jam shumë i lumtur që qeveria ka qenë e angazhuar vazhdimisht për t’i mbështetur ata. Për vitin 2024, qeveria ka shpallur një fond prej 100 milionë eurosh për shpërndarjen e bonusit të fundvitit. Ky bonus do të ndahet në dy shkallë: pensionistët që marrin deri në 20,000 lekë do të përfitojnë trefishin e bonusit të vitit të kaluar, në vlerën e 150 eurove, ndërsa pensionistët me pension më të lartë se 20,000 lekë do të marrin dyfishin e bonusit të mëparshëm, ose 100 euro. Përtej kësaj, ne jemi duke punuar që të sigurojmë që kjo mbështetje financiare të konsolidohet dhe të vazhdojë për brezat që vijnë. Përmes masave afatgjata si indeksimi i pensioneve dhe përpjekjeve për përmirësimin e qëndrueshmërisë së sistemit, synojmë të ofrojmë mbështetje më të qëndrueshme. Dua të siguroj gjithë moshën e tretë që angazhimi ynë është që asnjë pensionist të mos ndjehet i lënë pas./bulevard
