Ka dështuar sërish seanca e sotme gjyqësore e kërkuar nga Dritan Dajti në Gjykatën e Shkallës së Parë të Juridiksionit të Përgjithshëm Elbasan.
Shkak i dështimit të seancës sipas avokatit mbrojtës, ishte mosparaqitja në seancë e gjyqtares Thomaidha Roca. Shkak i dështimit të seancës sipas avokatit mbrojtës, ishte mosparaqitja në seancë e gjyqtares Thomaidha Roca. Mësohet se gjyqtarja ka paraqitur raport mjekësor pasi prej ditësh ka probleme shëndetësore. Gjykata nga ana e saj e ka njoftuar paraprakisht avokatin mbrojtës për mungesën e saj në seancën e planifikuar për t’u zhvilluar sot në orën 09:30.
Edhe seanca e kaluar dështoi për të njëjtën arsye. Dritan Dajti, i cili aktualisht është duke vuajtur dënimin në burgun e sigurisë së lartë të Peqinit, i ka kërkuar gjykatës deklarimin e përfundimit të ekzekutimit të vendimit të dënimit me 25 vjet burgim. Ai kohë më parë ishte në prag të lirimit nga qelia, por Prokuroria në mars 2019 ankimoi vendimin e Gjykatës së Apelit për Krime të Rënda, e cila vendosi pranimin e kërkesës për gjykim të shkurtuar të Dritan Dajtit dhe duke ulur dënimin e tij 25 vite burg.
Më datë 11 qershor 2024, Gjykata e Lartë prishi dënimin e Apelit për dënimin me 25 vite të Dajtit, duke e lënë në burg përjetë. Dajti i është drejtuar Gjykatës së Elbasanit duke kërkuar lirimin nga qelia, pasi sipas tij, e ka konsumuar dënimin me 25 vite burg dhe se prej datës 17 gusht 2024 po qëndron në qeli në kundërshtim me ligjin.
