Në një intervistë për televizionin MCN, kryetari i Partisë Demokratike-Demokratët Euroatlantikë, Lulzim Basha, ka theksuar se qëndrimet e tij dhe të partisë së tij nuk vijnë nga interesat e askujt, por janë parimore dhe të vërtetuara nga koha.
Ai ka akuzuar Sali Berishën për bashkëpunim me Edi Ramën për interesat e tij personale dhe kjo sipas tij u pa tek amnistia për të korruptuarit dhe mbyllja e listave duke e quajtur si një “pazar të ulët”.
Basha ka bërë thirrje për një bashkim të të gjithëve që duan të largojnë Ramën dhe të ndërtojnë një alternativë të vërtetë për të ardhmen e Shqipërisë, duke ofruar programin dhe ekipin e Demokratëve Euroatlantikë si një mundësi për të zhbërë çdo marrëveshje të korruptuar.
Pjesë nga intervista:
Lulzim Basha: Së pari qëndrimet tona nuk varet nga humoret e askujt. Ato janë qëndrime parimore të cilat janë vërtetuar nga koha si të drejta, siç është vërtetuar tashmë në sytë e çdokujt, edhe të mbështetësve më fanatik të zotit Berisha. Zoti Berisha për interest e veta personale bashkëpunon haptazi me Edi Ramën, siç ishte rasti i amnistisë për të korruptuarit e Edi Ramës, siç ishte rasti për mbylljen e listave bashkë me Edi Ramën dhe raste të tjera në të kaluarën. Këto e kanë reduktuar fasadën e revolucionit dhe të mosbindjes civile në atë çfarë aktualisht është e vërteta. Për interesat e tij personale, zoti Berisha bashkëpunon me Edi Ramën me një ekuacion ku njëri i ka lëshuar të drejtën të marrë sërish pushtetin në tavolinë në zgjedhjet e ardhshme, me qëllim që ky të mbajë në tavolinë monopin mbi opozitën. Ky është një pazar i ulët. Sikur asgjë tjetër, ky pazar mjafton për të refuzuar çdo lloj afrimi apo bashkëpunimi me dikë, apo një grup njerëzish, të cilët për interest e tyre personale, kanë lënë peng demokratët tek Edi Rama. Ndaj thirrja jonë ndaj çdokujt që tashmë e ka kuptuar të vërtetën, është që nuk është vonë t’i bashkohet Demokratëve Euroatlantikë si alternative e vërtetë në programin tonë, me ekipin tonë për të larguar Edi Ramën dhe qeverisjen e tij të korruptuar dhe për të zhbërë çdo pazar aktual dhe të projektuar me djersën dhe sakrificën e tyre dhe të ardhmen e shqiptarëve me Edi Ramën.
Pyetje: Pra e përjashtoni në mënyrë kategorike?
Lulzim Basha: Kategorikisht.
Basha theksoi se dera e Demokratëve Euroatlantikë mbetet e hapur për çdo individ apo faktor politik që ndan vlerat parimore të opozitës.
Basha deklaroi se Shqipëria nuk ka luksin e përçarjeve opozitare dhe se, për të luftuar një qeverisje të korruptuar dhe të inkriminuar, është e nevojshme bashkëpunimi me çdo faktor opozitar që refuzon marrëveshjet e fshehta mes qeverisë dhe disa pjesëve të opozitës.
Ai shtoi se synimi është t’i jepet fund tranzicionit të gjatë duke ndërtuar një alternativë të fortë për Shqipërinë.
“Çdo individ apo faktor politik që e sheh veten në këtë përqasje krejtësisht parimore tonën, nuk ka pse të përjashtohet. Prandaj e kam thënë dhe e them, dera ime, në kuptimin dera e Demokratëve Euroatlantikë, e imja si kryetar i tyre është e hapur dhe mbetet e hapur. Sepse Shqipëria nuk e ka luksin e fermentimit të energjive vërtetë opozitare kur përball ka jo thjesht një qeverisje thelësisht të korruptuar dhe të inkriminuar, por dhe një pjesë të opozitës të rënë në gjunjë për interest personale përballë kësaj qeverisjeje. Kjo është arsyea që kondicionon për hir të interesit publik, derën e hapur dhe bashkëpunimin potencial me çdo factor opozitar që refuzon këtë kurth, këtë realitet të bashkëpunimit të qeverisë me një pjesë të opozitës. Dhe na dikton një gjendje politike dhe vendore të bashkëpunimit me të gjithë faktorët politikë që duan me të vërtetë t’i japin fund kësaj valle të stërzgjatur të tranzicionit” – u shpreh Basha.
